Bizning qahramonlar butun dunyoga mashhur yulduzlarning oilasida dunyoga kelgan, ota-onalaridan bir necha million dollarlik boylik bilan birga goʻzallik va iqtidorni ham meros qilib olgan qizlar. Ular bolalik yillaridanoq yulduzlar safida koʻrinish berishadi, jiddiy loyihalar ustida ishlashadi. Katta ehtimol bilan bir necha yil ichida jahon yulduzlari roʻyxatida ularning ham ismi tilga olina boshlaydi.

Xelen Boshoven

Xelen Boshoven 17 yoshga toʻlib-toʻlmay nufuzli “Vogue” jurnalining muqovasidan joy olishni uddaladi. Buning hayratlanarli jihati yoʻq aslida, chunki u taniqli supermodel Xaydi Klumning qizi. Yosh modelda onasidan oʻtgan goʻzallik va harakatchanlik mujassamlashgan.

Deva Kassel

Deva Kassel – aktrisa Monika Belluchi va aktyor Vensan Kasselning qizi. U ayni vaqtda bor-yoʻgʻi 17 yoshda, ammo modellik faoliyatini bir necha yil oldin boshlab ulgurgan. Uni mashhur jurnallar uchun fotosessiyalarga taklif etishadi.

Kayya Gerber

Supermodel Sindi Kroufordning qizi Kayya Gerber bugungi kunda 19 yoshda va taniqli modellar qatorida podiumlarga chiqa boshlagan. Bundan tashqari, yosh model filmlarda suratga tushishni ham kanda qilmayapti. Tez orada uni Gollivudning mashhur yulduzlari orasida koʻrsak ajab emas.

Blu Ayvi

Xonanda Beyonse va reper Jey-Zining toʻngʻich qizi Blu Ayvi hali juda yosh. Shunga qaramay, qizaloq mashhur ota-onasidan oʻrnak olgancha, bir nechta qoʻshiq yozib ulgurganiga nima deysiz? Kelgusida uning ham sahna bilan bogʻliq yoʻnalishda ketishiga shubha yoʻq.

Keri Duglas

Aktrisa Ketrin Zeta-Jons va Maykl Duglasning 19 yoshli qizi Keri modellik olamiga qadam qoʻygan. U onasi bilan birga yulduzli davralarga tashrif buyuradi, moda namoyishlarida ishtirok etadi, suratga olish jarayonlarida ham faollik koʻrsatadi.

• Kino
• San’at
• mashhurlar