Toshkentda Sog‘liqni saqlash vazirligi, Toshkent pediatriya tibbiyot instituti va O‘zbekiston radiologlari jamiyati tomonidan “Bolalar radiologiyasining dolzarb muammolari” mavzusida xalqaro ilmiy-amaliy konferensiya bo‘lib o‘tmoqda. Unda Rossiya, Germaniya, Koreya Respublikasi, Avstriya, Avstraliya, Hindiston, Qozog‘iston kabi qator davlatlardan olim va mutaxassislar ishtirok etishmoqda.

Ta’kidlanganidek, bugungi kunda sog‘liqni saqlash tizimini isloh qilishning muhim omillaridan biri bu diagnostika xizmatini takomillashtirishdir. So‘nggi yillarda kuzatilgan radiologiya tashxisining jadal rivojlanishi klinik tibbiyot uchun mutlaqo yangi imkoniyatlarni ochib, inson tanasining deyarli barcha a’zolari va to‘qima tuzilmalarida tadqiqotlar o‘tkazish uchun qulay imkoniyatlar yaratdi. O‘zbekiston klinikalarida radiologiya sohasidagi eng so‘nggi zamonaviy texnologiyalarni muvaffaqiyatli joriy etilishi kasallikka tez va aniq tashxis qo‘yish bilan birga bemorlarni sog‘lom hayotga qaytarishda ham muhim omil bo‘lmoqda.

Dunyoning yirik tibbiyot markazlari statistikasi shuni ko‘rsatadiki, nurlanish usullari yordamida bemorni dastlabki davolashda noto‘g‘ri tashxislar soni bugungi kunda 4 foizdan oshmaydi va jiddiy kasalliklarning hayot uchun xavfli asoratlari soni so‘nggi 20 yil ichida 8 foizdan 1,5 foizgacha kamaydi.

So‘nggi yillarda O‘zbekiston tibbiyot tizimi muassasalari uchun 355 dona rentgen apparatlari, shu jumladan, 455 dona ultratovush diagnostikasi, 38 ta kompyuter tomograflari, 3 ta bitta fotonli emissiya tomograflari, 39 ta raqamli florograflar, chiziqli tezlatgichlar va boshqa radiologik uskunalar sotib olindi va o‘rnatildi. Natijada, uskunalarning umumiy soni 10 foizga oshdi. Statsionar uskunalar ulushi esa O‘zbekiston bo‘yicha o‘rtacha 70 foizga etdi. Tibbiy diagnostika xizmatlari xususiy sektorda ham jadal rivojlanmoqda. Ko‘plab yirik xususiy klinikalar MPT, MCKT, 3D, 4D — sonografiya, PET singari zamonaviy rentgenologik texnologiyalar bilan jihozlangan. Bu esa, o‘z navbatida, aholiga yuqori texnologiyali tibbiy yordam ko‘rsatish imkoniyatini kengaytirmoqda.

Tadbirda ushbu texnologiyalardan to‘liq va oqilona foydalana oladigan va zamonaviy diagnostika algoritmlarini amaliyotga tatbiq eta oladigan yuqori malakali mutaxassislar — rentgenologlarni tayyorlash muhim vazifa hisoblanishi qayd etildi.