“Real” bosh murabbiyi firibgarlik qilganini tan oldi 

Karlo Anchelotti Madridda prokuratura tomonidan sud qilindi. Bu haqda Marca xabar berdi.

Qayd etilishicha, Madridning “Real” klubi bosh murabbiyi Karlo Anchelotti juma kuni Madridda prokuratura tomonidan 2014 va 2015-yillarda sodir etilgan ikkita soliq huquqbuzarligi uchun unga qo‘yilgan ayblovlar bo‘yicha sudga tortildi.

62 yoshli italiyalik 2014-yilda soliq bo‘yicha firibgarlikdagi aybini qisman tan oldi va maslahatchilar unga yomon tavsiyalar berganini aytdi. Anchelotti, tergov ma’lumotlariga ko‘ra, ushbu davr uchun g‘aznaga 1 million yevro to‘lamagan. Ma’lum bo‘lishicha, murabbiy soliq idorasiga kerakli miqdorni to‘lashga rozi bo‘ldi.

Shu bilan birga, Anchelotti 2015-yilgi ishda aybini tan olmadi. U o‘sha yili soliq to‘lash uchun Ispaniyada yetarlicha uzoq vaqt (183 kun) qolmaganini da’vo qildi.

Bu borada prokurorning asosiy argumenti shundaki, 2014 va 2015-moliyaviy yillarda Anchelotti “Bavariya” ga 2016-yilda kelguniga qadar “boshqa biron bir klubda murabbiy sifatida professional faoliyatidan daromad olmagan”. Demak, uning asosiy daromad manbai “Real” bo‘lgan.

Prokuratura ma’lumotlariga ko‘ra, Anchelotti soliq to‘lashdan qochish maqsadida, shuningdek, imij huquqidan yoki boshqa brendlardan olingan daromadlarni deklaratsiya qilmagan.