Mazali, xushbo‘y, shamollash simptomlarini yengillashtiradigan limonli choyni kim ham xush ko‘rmaydi, deysiz! Choyni kimdir shakar, murabbo, jem, asal bilan ichishni yaxshi ko‘radi. Kimlargadir esa choyxo‘rlik qilish uchun desert, konfet, pirojniy, tort yoki pechenye kerak. Biroq ko‘pchilikka limonli choy juda ma’qul keladi. Xo‘sh, uni qonun-qoidasi bilan qanday tayyorlash mumkin?

Choyga limonning barcha xushbo‘y hidi va nordon mazasi o‘tishi uchun limonli choyni quyidagicha tayyorlash lozim:
Buning uchun limonni yaxshilab yuvib, uni qaynoq suvda biroz iviting. Keyin po‘chog‘ini archib, qobig‘idan biroz stakanga soling va shakar bilan aralashtiring. Ustidan tayyorlab qo‘yilgan choyni quyib, bir bo‘lak tozalangan limon bo‘lagini solib yuboring. Bunday limonli choy ancha mazali va xushbo‘y bo‘ladi.

Limonli choyni boshqacha usul yordamida ham tayyorlash mumkin. Oqqand bo‘lagini limonga yaxshilab ishqalang va keyin chashkaga solib, ustidan damlangan choy quying. Bunday usul yordamida choy limonning butun xushbo‘yligini o‘ziga singdirib oladi.