Euronews’ning rus nashri O‘zbekistonda bo‘lib o‘tgan Prezidentlik saylovi haqida tasdiqlanmagan xabar tarqatmoqda.
Nashrning iddaosicha, O‘zLiDePdan ko‘rsatilgan nomzod Shavkat Mirziyoyev 90 foiz ovoz bilan ikkinchi muddatga qayta saylangan.

Shuningdek, “euronews” Mirziyoyevning hukumat tepasiga kelishi tarixi hamda amaldagi prezidentning mamlakatda olib borgan islohotlari to‘g‘risida qisqacha to‘xtaladi.

Bundan tashqari nashr xalqaro hamjamiyatning O‘zbekistondagi Prezidentlik sayloviga bo‘lgan qiziqishlari “ko‘p jihatdan mamlakatning Afg‘oniston bilan chegaradoshligi va “Tolibon”ning ushbu mamlakatga ta’sirini oldini olish muhim”liligi bilan bog‘liqligini ta’kidlaydi.

O‘z navbatida Markaziy saylov komissiyasi matbuot xizmati Prezident saylovining dastlabki natijalari e’lon qilinganligi haqida xabarlar yuzasidan munosabat bildirib, “bu xabar haqiqatga mutlaqo to‘g‘ri kelmasligini” aytmoqda.

“Bu xabar haqiqatga mutlaqo to‘g‘ri kelmaydi. Prezident saylovining dastlabki natijalari bugun Toshkent vaqti bilan soat 16:00 da Markaziy saylov komissiyasi raisi Zayniddin Nizomxo‘jayev tomonidan e’lon qilinishini yana bir karra eslatib o‘tamiz”, – deyiladi MSK munosabatida.