2022-yil 1-iyulga qadar Qoraqalpog‘iston Respublikasi, viloyatlar va Toshkent shahrining 15 ta hududidagi ko‘p kvartirali uy-joylarning boshqaruvini boshqaruv-servis tashkilotlariga biriktirish loyihasi  amalga oshiriladi. 

Bu haqda Prezidentning “Ko‘p kvartirali uy-joylarni boshqarish tizimini yanada takomillashtirish to‘g‘risida”gi qarorida ma’lum qilindi.

Qayd etilishicha, tanlangan hududlarda jami 1 227 ta ko‘p kvartirali uylar, 55 mingga yaqin xonadon mavjud bo‘lib, ularda 180 mingdan ortiq aholi istiqomat qiladi. Bu hududlarda jami 90 ta avtoturargoh, 128 ta chiqindi tashlash shoxobchalari, 3,4 mingta hovli joy, shuningdek, 30 ta maktab, 64 ta bolalar bog‘chasi, 9 ta oliy ta’lim muassasalari mavjud.

Loyiha doirasida boshqaruv-servis tashkilotlariga: 
–  hududdagi barcha xususiy uylar va tashkilotlarga kelishuv asosida kommunal va ta’mirlash xizmatlarini ko‘rsatish;
–  hokimlik bilan tuzilgan shartnomaga asosan hududni ko‘kalamzorlashtirish va obodonlashtirish;
–  24 soat faoliyat yuritadigan dispetcherlik va avariyalarni bartaraf etish xizmatini tashkil etish kabi qo‘shimcha vazifalar yuklanadi.

Bunda boshqaruv-servis tashkilotlariga hududdagi maktab, bog‘cha, shifoxonalar va boshqa davlat buyurtmachilari bilan to‘g‘ridan-to‘g‘ri shartnoma tuzgan holda, avariya vaziyatlarini bartaraf etish, muhandislik tarmoqlari va kommunikasiyalariga xizmat ko‘rsatishga ruxsat beriladi.