Joriy yil 23-avgust kuni taxminan soat 20.00 da Chilonzor tumanida “Xavfsiz poytaxt” konsepsiyasi doirasida o‘tkazilgan profilaktik tadbir davomida xatti-harakatlari shubha uyg‘otgan 19 yoshli O‘razali J. to‘xtatildi. 

Tekshiruv davomida uning yonidan 12 dona kichik o‘ramlarda jami og‘irligi 6,01 gr. Bo‘lgan “geroin” topilgan. Tadbir davom ettirilib, O‘razali J. tomonidan shaharning 8 hududida yashirib qo‘yilgan narkotik moddalar o‘ramlari topilgan.

Toshkent viloyatida tug‘ilgan O‘razali J. ning aytishicha, u internet orqali ish qidirib, Oleg ismli shaxs bilan tanishib qoladi. Oleg unga manzil bo‘yicha borib yashirib qo‘yilgan turli vaznlardagi “geroin” o‘ramlarini olish va ularni o‘zi xohlagan joylarga yashirib, telegram messenjeri orqali geomanzilini o‘ziga tashlab berishi kerakligini aytadi. Va unga bu ishlari uchun 300-500 AQSh dollari miqdorida maosh taklif qiladi. 

O‘razali J. tergovda o‘z aybiga iqrorligini, bu ishi jinoyat ekanligini oldindan bilganini, qolaversa, Oleg ismli shaxs unga agar qo‘lga tushsa hech qanday yordam bermasligi haqida oldindan ogohlantirganini ma’lum qildi. 

Mazkur fakt asosida Jinoyat kodeksining 273-moddasi 5-qismi bo‘yicha (“Giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek ularni qonunga xilof ravishda o‘tkazish”) jinoyat ishi qo‘zg‘atildi.