Hozirgi kungacha o‘ylab topilgan har qanday ixtiro inson hayotini yengillashtirish uchun xizmat qilgan. “Zamok”ni ixtiro qilganlarga rahmat aytging keladi. Chunki mana shu kichik ixtiro bilan odamlar hayoti ma’lum ma’noda yengillashgan. “Zamok”ning tiqilib yoki buzilib qolishi esa kutilmagan holatda sodir bo‘lishi mumkin. Eng yomoni buzuq “zamok”li ko‘ylak yoki shim bilan hech qayerga bora olmaslikdir. 

1. “Zamok” tiqilib qolsa

Eng avvalo, vahima qilmang. Birinchi navbatda “zamok” tishchalari orasiga mato tiqilib qolmaganligini tekshiring. Hammasi joyida bo‘lsa, uning tishchalari yo‘liga vazelin, sham yoki zaytun moyi surting va kuchukchani oldinga va orqaga yurgizib ko‘ring. Odatda, “zamok” tishchalari moylangach, kuchukcha yurib ketadi. 

2.  Agar “zamok” ish joyingizda tiqilib qolgan bo‘lsa-yu, sizda yuqorida ko‘rsatilgan vositalar bo‘lmasa, oddiygina qalamdan foydalaning. Kuchukcha yo‘liga qalam ishqalab chiqiladi.

3. “Kuchukcha”ning tutqichi sinib qoldimi? Tutqich o‘rniga “skrepka” yoki “brelok” halqasini o‘rnating.

4.  Ba’zida shimdagi kuchukcha pastga tushib ketib, “zamok” ochilib qoladi. Bu holatda yana o‘sha “brelok” halqasi yordam beradi. Uni kuchukchaga o‘rnatib, shim tugmasiga ilib qo‘yiladi.  

5.  Kuchukcha o‘zidan-o‘zi pastga surilib, “zamok” ochilib qolayotgan bo‘lsa, uni tuzatish uchun mutaxassisga berishga shoshilmang. Chunki bu holat kuchukcha orasining kengayishi sabab yuzaga keladi. Kengaygan kuchukcha ombir yordamida qisilsa, orasi torayib, u yana me’yorida yura boshlaydi.