Ijtimoiy tarmoqlarda “Abdullaxon” madrasasi devori qulab tushgani haqida xabarlar tarqaldi. Buxoro viloyati hokimligi matbuot xizmati mazkur holat yuzasidan rasmiy munosabat bildirdi.

Qayd etilishicha, 30-iyul kechasi ko‘p yillik texnogen jarayonlar (issiq va sovuq iqlim, yog‘ingarchiliklar va yer osti suvlarining ko‘tarilishi) ta’sirida “Abdullaxon” madrasasi orqa tomon devorining bir bo‘lagi o‘pirilib tushgan.

Ta’kidlanishicha, ushbu holat bo‘yicha Madaniy meros agentligining viloyat boshqarmasi, Buxoro shahar hokimligi, restavratorlar va soha mutaxassislaridan iborat ishchi guruh tuzilib, joyida o‘rganish o‘tkazildi. Shunga ko‘ra, tezkor chora-tadbirlar belgilanib, Respublika Madaniy meros agentligidan vakillar jalb qilindi va “Abdullaxon” madrasasining orqa qismi tevorining o‘pirilib tushgan bo‘lagini belgilangan tartibda tegishli loyiha asosida qayta tiklash va zaruriy restavrasiya ishlarini tashkil etish ishlari boshlandi.

“Buxoroda texnogen jarayonlar oqibatida nurashi, yemirilishi va qulab tushishi ehtimoli yuqori bo‘lgan 40 ta madaniy meros obyektini umumbashariy qiymatini saqlash, ularda tiklash, restavrasiya va ta’mirlash ishlarini amalga oshirish bo‘yicha olimlar, restavratorlar va malakali mutaxasislar tomonidan o‘rganishlar o‘tkazilgan holda zarur chora-tadbirlar belgilanishi haqida Hukumatga aniq takliflar yuborildi”, deyiladi hokimlik munosabatida.

Aytilishicha, holat yuzasidan prokuratura organlari tomonidan surishtiruv ishlari ham olib borilmoqda.