Бош прокуратура ходими Самирбек Рахмонов 2021 йил апрель ойида иш жойида вафот этган эди. Марҳумнинг отаси Аъзамжон Рахмонов ўғлининг ўлими учун товон ундириш масаласида дастлабки суд ишида ютқазган, аммо Тошкент шаҳар суди апелляция судлов ҳайъати Бош прокуратура фойдасига чиқарилган ажримни ноқонуний деб топиб, қайтадан кўриш учун ишни Мирбод судига юборган эди.

Ўтган йилнинг апрель ойида иш жойида вафот этган Бош прокуратура ходими Самирбек Рахмоновнинг отаси ҳам вафот этди. У ўғлининг иш жойида вафот этганлиги сабабли, Самирбекнинг 4 нафар вояга етмаган фарзандлари ва бева қолган турмуш ўртоғи учун Бош прокуратурадан товон пули ундириш бўйича судлашган эди.

Фуқаролик ишлари бўйича Миробод туманлараро суди ишни Бош прокуратура фойдасига ҳал қилганидан кейин, марҳум ходимнинг отаси Тошкент шаҳар судига апелляция шикояти берган ва апелляция суди ФИБ Миробод туманлараро судининг қарорини ноқонуний деб топиб, уни бекор қилган ва яна қайтадан кўриш учун ишни Мирбод судига юборган эди.

Айни Мирбод судида бу иш қайта кўрилаётган вақтда ислом ҳуқуқи бўйича мутахассис бўлган Аъзамжон Рахмонов вафот этган.

Эслатиб ўтамиз, юқорида таъкидланганидек, мазкур суд ишини кўриш давомида Тошкент шаҳар суди апелляция судлов ҳайъати ўғил – Самирбек Раҳмоновнинг вафоти юзасидан Бош прокуратура фойдасига хулоса берган мутахассислар қонунчиликни бузган деган фикрга келган. Бу эса, марҳум ходимнинг меҳнат фаолияти билан боғлиқ сабаб туфайли вафот этганлигини тасдиқлаши мумкин.

Агар навбатдаги суд мажлиси Самирбек Раҳмоновни иш фаолияти билан боғлиқ сабаб билан вафот этган деб топса, Бош прокуратура марҳумнинг яқинларига тўловларни, хусусан, Меҳнат кодексининг 194-моддасига асосан 6 йиллик ўртача иш ҳақи миқдоридаги нафақа тўловлари тўлаб бериши мумкин.

• Бош прокуратура
• Меҳнат