Олмаотада январ воқеалари чоғида ўғирланган қурол-яроғларнинг катта партияси қўлга олинди.

Қозоғистондаги тартибсизликлар бўйича жиноят ишини тергов қилиш жараёнида транспорт полицияси ходимлари шу йилнинг 5-6 январ кунлари Олмаота шаҳридаги қурол дўконларидан ўғирлаб кетилган қуроллар партияси яширилган жойни аниқлашган. Бу ҳақда Полиция транспорт бошқармаси бошлиғи Ўнал Бекиев маълум қилди.

Ўнал Бекиевга кўра, Олмаота аэропортидаги тартибсизликларда иштирок этган 23 ёшли Ўзбекистон фуқароси мазкур ўғирликда гумон қилиниб қўлга олинган ва унинг яшаш жойида иккита пичоқ ва битта пневматик тўппонча олиб қўйилган.

Шунингдек, полиция унинг 43 ёшли шеригини ҳам қўлга олган. Тинтув чоғида мазкур шахснинг яшаш хонадонидан 19 дона пневматик қурол ва улар учун патронлар, 10 дона пичоқ, битта арбалет, олтита оптик нишон ва учта оптик мослама олиб қўйилди.

– Мазкур ҳолат юзасидан тергов ҳаракатлари олиб борилмоқда. Гумонланувчи шахсларнинг бошқа жиноятларга алоқадорлиги текширилади. Шунингдек, уларнинг шерикларини аниқлаш ва қўлга олиш чоралари кўрилмоқда”, – дейди Ўнал Бекиев.

Эслатиб ўтамиз, аввалроқ ҳам Қозоғистондаги тартибсизликларда алоқадорликда айбланиб, 14 нафар ўзбекистонлик қўлга олингани айтилган эди.

• Жиноят
• Намойиш
• Ўзбекистон
• Қозоғистон
• Қурол
• январь