Иш бўйича биринчи суд мажлиси 3 май куни жиноят ишлари бўйича Миробод туман суди биносида бўлиб ўтди. Унда 4 нафар шахс, жумладан, “Интерлогистисс” МЧЖ раҳбари ва қўриқчиси, “Полйчем” МЧЖ бошқарувчиси ҳамда бир нафар ходими жавобгарликка тортилган. Судланувчиларнинг барчаси Жиноят кодексининг 259-моддаси (Ёнғин хавфсизлиги қоидаларини бузиш) 2-қисми “а” ва “б” бандларида назарда тутилган жиноятларни содир этишда гумонланмоқда.

Судни ёритиш учун броган оммавий ахборот воситаларининг маълум қилишича, судда 20 га яқин фуқаролар жабрланувчи сифатида қатнашган. Суд очиқ бўлиши белгиланган, бироқ суд мажлиси ўтган хонада нафақат оммавий ахборот воситалари вакиллари, балки судланувчиларнинг яқинлари ва жабрланувчилар қатнашиши учун шароит ва жой етарли бўлмаган. Шу сабабли, адвокатлар томонидан келаси суд ишини Тошкент шаҳар суди биносида кўриб чиқиш таклиф этилган.

Судда айтилган маълумотларга кўра, портлаш оқибатида етказилган зарарнинг суммаси ҳали ҳисоблаб чиқилмаган. Судланувчиларга айблов хулосаси тақдим этилмагани туфайли суд иши 8 май кунига қолдирилди.
Эслатиб ўтамиз, бу портлаш ўтган йилнинг 28 сентябрь куни тунда Тошкент шаҳри Сергели туманидаги "Қурувчилар" даҳасида "Интер Логистисс" МЧЖга қарашли омборхонада содир бўлган эди. Оқибатда ҳудуддаги 26 та кўп қаватли уйнинг 592 та хонадони ҳамда 8 та хизмат кўрсатиш шохобчаси, 1 та мактаб ва 2 та МТТ биноларининг фасад қисми ҳамда дераза-ромларига зарар етган.

Шунингдек, портлашда 163 нафар фуқаро жабрланди ва ҳодиса оқибатида 2006 йилда туғилган бир нафар ўсмир воқеа жойида вафот этди.

Фавқулодда ҳолат оқибатларини бартараф этишга Миллий гвардия отрядлари жалб этилди ва воқеа жойига Тошкент шаҳар ҳокими Шавкат Умурзоқов ва Бош вазир Абдулла Арипов етиб бориб, ҳолатни назоратга олди. Шаҳар ҳокимининг маълум қилишича, етказилган моддий зарар қоплаб берилган.

• Суд