UFC’ning yarim og‘ir vazn toifasidagi chempioni Jon Jons og‘ir vazn toifasi vakili Frensis Ngannuni jangga chorladi, deb yozmoqda Sportsnet nashri.

Ta’kidlanishicha, Frensis UFC 249 turniri doirasida o‘tkazilgan jangda Jairzinyo Rozenstraykni 20 soniyada nokautga uchratgach, Jon Jonsda u bilan jang qilish istagi paydo bo‘lgan.

“Nima deb o‘ylaysiz, qaysi biri tezlik va texnika borasida yaxshiroq – Tiago Santosmi yoki Frensis Ngannu? Agar siz Santos bilan jang qilishimni istasangiz, unda aqldan ozib qolibsiz. Yarim og‘ir vazn toifasida isbotlaydigan narsam qolmadi. Men Ngannuga qarshi jangda pul ishlamoqchiman. Shartnomani menga jo‘nating”, deb yozadi Jons o‘zining Twitter’dagi sahifasida.

Ngannu ham o‘z navbatida ushbu taklifni qabul qildi.
“Agar mening texnikamga dosh bera olaman, deb o‘ylasang, nima ham derdim. Ammo bir masalada fikringga qo‘shilaman, yarim og‘ir vaznda sen isbotlaydigan narsa qolmagan, shunday ekan bizning jang katta pul uchun bo‘ladi”, deya javob bergan sportchi.

Ma’lumot o‘rnida, Jon Jons yarim og‘ir vazn toifasida ikki karra jahon chempioni hamda UFC’ning umumiy reytingi yetakchisi hisoblanadi.

Ngannu esa mutlaq og‘ir vazn toifasi reytingida Stipe Miochich va Deniyel Kormyedan keyingi o‘rinda turadi.