O‘zbekistonda Geologiya fanlari universiteti tashkil etiladi. Bu borada bugun, 8-iyun kuni Prezident qarori qabul qilindi.
 
Qaror matniga ko‘ra, 2020/2021 o‘quv yili uchun Universitetga talabalarni qabul qilish jarayoni talabga muvofiq taʼminlanadi.
 
Davlat geologiya qo‘mitasi hamda Oliy va o‘rta maxsus taʼlim vazirligi universitet huzurida yetakchi geologiya va konchilik yo‘nalishidagi xorijiy oliy taʼlim muassasalarining, shu jumladan, Sankt-Peterburg konchilik universitetining maxsus umumtaʼlim va bazaviy texnik fanlarini o‘qitishga ixtisoslashgan Boshlang‘ich muhandislik tayyorlash markazini tashkil etishda masʼul hisoblanadilar.
 
Shuningdek, Universitetning Geoinnovatsion texnologiyalar markazi tashkil etilsin.
 
Markazda yer qaʼrini geologik o‘rganish, oqilona foydalanish va muhofaza qilish sohasida tadqiqotlar va ishlanmalarni yana-da rivojlantirish uchun ilg‘or ilmiy-texnik baza yaratiladi va samarali faoliyat yuritiladi.
 
Maʼlumot uchun, Universitet 2020/2021 o‘quv yilida I.Karimov nomidagi Toshkent davlat texnika universiteti binosiga tekin foydalanish huquqi asosida joylashtiriladi.