Бугун, 21 декабр куни Тошкент шаҳрида бўлиб ўтаётган “Тошкент ёшлар форуми–2021” доирасида Аёллар форуми бўлиб ўтмоқда.

Унда қатор спикерлар қатнашиши ва уларнинг жамиятда хотин-қизлар ўрни ҳақида маъруза ўқишлари режалаштирилган.

Форум доирасида сўз олган дастлабки спикер бир муддат олдин Низомий номидаги Педагогика университетида содир бўлган “замдекан машмашаси”да асосий иштирокчиларидан бири Муштарий Камиловага сўз берди.

Муштарий Камилова ўз чиқишида мазкур воқеага кенг тўхталиб, ўз орзуларига етишишида бу воқеа тўғаноқ бўлганини айтади. У шунингдек, айни пайтда тергов ишлари тугамаган жиноят иши доирасида айбловни тўлиқ иккинчи томон (Педагогика университети декан ўринбосари, -таҳр.)нинг зиммасига юклайди.

“Дўстларим, севимли ишим, ўқишим ва келажак учун катта режаларим бор эди. Лекин 2021 йилнинг 18 октябрь куни саноқли сонияларда ҳаммасини йўқотдим.

Менинг орзуларим ва хаётимни ўғирлаган инсон исми — Юлдашбек Боғабаев. Менинг университетимда декан ўринбосари лавозимида ишлаган, менинг номусимга тегишга ҳаракат қилиб, сўнг деразадан улоқтирди. Ўша пайтда бирон суягим омон қолмаган деб ўйладим, оғриқ шу қадар кучли эди. Баъзан, ҳозир уйғонаман-у, барчаси оддий туш эканлиги бўлиб чиқадигандай туюлади”, – дейди у.

Xabardor.uz ИИВ Матбуот котиби Ш.Ғиёсовдан мазкур жиноят ишининг тугалланган ёки тугалланмагани юзасидан жавоб олди ва унга кўра, айни пайтда “материаллар судга берилиши кутиляпти. Бундай ишлар одатда ёпиқ кўрилади (ёпиқ суд мажлисларида, -таҳр.).”

Таҳририятнинг, мазкур жиноят ишини содир бўлган кунидан бошлаб кузатиб келаётган сабабли, Муштарий Камилованинг бугунги чиқиши юзасида ҳамда уни форумда иштирок этишини хоҳлаган ташкилотларга қатор саволлари пайдо бўлди.

– Бу ҳолатда Юлдашбек Боғабаевга нисбатан айбсизлик презумпцияси принципи бузилмаяптими?

– Нега суд ҳукмидан аввал “замдекан”га нисбатан айблов иккинчи томон тилидан оммага сингдириляпти ёки ҳукм аллақачон тайёрми?!

– Ташкилотчилар мамлакатда аёллар ҳуқуқларини тиклаш учун “жабрдийдалар”ни топишди нега нўноқлик қилишди ёки республикада ҳақиқатда жабр кўрган хотин-қизлар камми?

Маълумот учун:

Жиноят содир этганликда айбланаётган ҳар бир шахснинг иши судда қонуний тартибда, ошкора кўриб чиқилиб, унинг айби аниқланмагунча у айбдор ҳисобланмайди. (Конституция 26-модда)

Гумон қилинувчи, айбланувчи ёки судланувчи унинг жиноят содир этишда айбдорлиги қонунда назарда тутилган тартибда исботлангунга ва қонуний кучга кирган суд ҳукми билан аниқлангунга қадар айбсиз ҳисобланади. (Жиноят кодекси 23 модда)

Бундан ташқари, ЖПКнинг 84, 454-моддалари, Ўзбекистон Республикаси "Судлар тўғрисида"ги Қонуни 16-моддасининг иккинчи қисми, Олий суд Пленумининг 2014 йил 23 майдаги 07-сонли "Суд ҳукми тўғрисида"ги қарори 1-бандининг иккинчи хатбошиси, Олий суд Пленумининг 2003 йил 19 декабрдаги 17-сонли "Гумон қилинувчи ва айбланувчини ҳимоя ҳуқуқи билан таъминлашга оид қонунларни қўллаш бўйича суд амалиёти тўғрисида"ги қарори 5-бандининг биринчи хатбошисида ҳам  айбсизлик презумпциясига оид тартиблар белгилаб берилган.

• ИИББ
• Жиноят
• Тошкент