Ўзбекистон Республикаси Президентининг “Янги Ўзбекистон маъмурий ислоҳотларини амалга ошириш чора-тадбирлари тўғрисида”ги фармони имзоланди.

Унга кўра, 2023 йил 1 январдан бошлаб:

Ҳукуматга бўйсунадиган ижро органлари сони 61 тадан 28 тага қисқартирилмоқда. Бунда, 20 та идора тўлиқ тугатилади.

Шунингдек, барча вазирликларнинг штатлари 30 фоизгача қисқартирилади.

Илғор хорижий тажрибалар асосида давлат бошқаруви идоралари фақат вазирлик, қўмита, агентлик ва инспекциядан иборат бўлади. Бунда, вазирлик тегишли соҳада давлат сиёсатини амалга оширишга масъул бўлиб, тармоққа кирувчи қўмита, агентлик ва инспекцияларга раҳбарлик қилади.

Шунингдек, мавжуд 25 та вазирлик ўрнига 21 та вазирлик ташкил этилади. Булар:

– Инвестициялар, саноат ва савдо вазирлиги;
– Иқтисодиёт ва молия вазирлиги;
– Тоғ-кон ва геология вазирлиги;
– Қурилиш ва уй-жой коммунал хўжалиги вазирлиги;
– Камбағалликни қисқартириш ва бандлик вазирлиги;
– Олий таълим, фан ва инновациялар вазирлиги;
– Мактабгача ва мактаб таълими вазирлиги;
– Табиат ресурслари вазирлиги;
– Ёшлар сиёсати ва спорт вазирлиги;
– Қишлоқ хўжалиги вазирлиги;
– Сув хўжалиги вазирлиги;
– Рақамли технологиялар вазирлиги;
– Адлия вазирлиги;
– Транспорт вазирлиги;
– Маданият ва туризм вазирлиги;
– Мудофаа вазирлиги;
– Энергетика вазирлиги;
– Соғлиқни сақлаш вазирлиги;
– Ташқи ишлар вазирлиги;
– Ички ишлар вазирлиги;
– Фавқулодда вазиятлар вазирлиги.

Шунингдек, эндиликда Ҳукуматда амалдаги 8 нафар бош вазир ўринбосари ва 3 нафар Бош вазир маслаҳатчиси лавозимларидан фақат 4 нафар Бош вазир ўринбосари мавжуд бўлади.

Бош вазир ўринбосари бир вақтнинг ўзида вазир ёки бошқа раҳбарлик лавозимини эгалламайди ҳамда вазирликлар ва бошқа давлат идоралари фаолиятини тўғридан-тўғри бошқармайди.

Вазирлар Маҳкамасининг ижро этувчи тузилмасида амалдаги 269 та штатдан 120 таси қолдирилади.

Иқтисодиёт ва ижтимоий соҳалар бўйича котибиятлар, департаментлар ва улар ҳузуридаги бўлимлар, шунингдек, Маданий меросни ҳимоя қилиш инспекцияси, Ҳарбийлаштирилган тузилмалар фаолиятини молиявий ва моддий-техник таъминлаш бўлими, Маҳалла ва нуронийларни қўллаб-қувватлаш масалалари бўлимидан иборат Вазирлар Маҳкамаси аппарати тугатилади.

Унинг ўрнига Бош вазир котибияти ташкил қилинади.

• Ҳукумат
• Vazirlar Mahkamasi