Курск вилоятида 6-8 сентябрга белгиланган вилоят раҳбари сайловлари муддатидан аввал 28 август куни бошланади. Бу ҳақда вилоят сайлов комиссияси қарор қабул қилди.

Қарор “Россия Федерацияси фуқароларининг хавфсизлиги, ҳаёти ва соғлиғини ҳимоя қилиш мақсадида” қабул қилинди, дейилади сайлов комиссиясининг расмий баёнотида.

Эслатиб ўтамиз, Украина қуролли кучларининг Курск вилоятига кенг кўламли ҳужуми 6 август куни бошланганди. Уч кундан кейин эса минтақада аксилтеррор операцияси режими эълон қилинди.

Овоз бериш “ўта оғир вазиятда ўтади”, – деб ёзган губернатор вазифасини бажарувчи Алексей Смирнов.

Маълумот учун, Алексей “Ягона Россия”дан губернаторликка номзод сифатида рўйхатга олинган.

Шунингдек, Украина Қуролли кучларининг Курск вилоятига бостириб кириши бошланганидан бери вилоятнинг тўққиз туманидан 121 мингдан ортиқ одам эвакуация қилинди, деб хабар бермоқда Фавқулодда вазиятлар вазирлиги. Умуман олганда, вилоятнинг 180 минг аҳолиси эвакуация қилиниши кераклиги таъкидланмоқда.

• Россия
• Украина