Mashhur “nusxa olish – nusxa qo‘yish” (Ctrl+C – Ctrl+V) kompyuter buyrug‘ini o‘ylab topgan amerikalik kompyuter olimi, informatik Larri Tesler vafot etdi. Ha, aytgancha u “kesib olish” buyrug‘ini ham ixtiro qilgan edi. Larri Tesler 74 yoshida, AQShda hayotdan ko‘z yumdi.

Apple’dan tortib Yahoo’gacha...
Tesler 1965-yil AQShning Stenford universitetini matematika mutaxassisligi bo‘yicha tamomlagan. Oradan ma’lum vaqt o‘tgach, yosh matematik 1973-yilda Xerox PARC ilmiy-tadqiqot markaziga ishga kiradi va o‘sha yerdagi faoliyati davomida “nusxa olish – nusxa qo‘yish” va “kesib olish” kompyuter buyruqlarini ishlab chiqadi.
 
1980-yilda esa Tesler mashhur brend – Apple kompaniyasi bilan ham hamkorlik qilgan va kompaniyaning bir qancha mahsulotlari ishlab chiqarilishida faol qatnashgan. 1997-yilda u Apple’dan ketadi hamda Amazon va Yahoo texnologiya kompaniyasida ish boshlaydi.
     
“Larri Tesler haqiqiy ilmiy tadqiqotchi edi. Uning sa’y-harakatlari tufayli kompyuterda ishlaydiganlar ishi bir necha martaga osonlashdi”, deyiladi Xerox o‘zining Twitter’dagi sahifasida. Olimning o‘lim sababi ma’lum qilinmagan.