Ayni vaqtda bakalavriatni bitirayotgan bir qancha talabalarning oldida “Magistraturada oʻqisammikan?” degan savol turibdi. Bir tomondan, talabalik hayotidan ayrilging kelmaydi, bir tomondan, oliy ta’limning obroʻliroq ikkinchi bosqichida oʻqishni ham istaysan. Yakuniy qarorga kelish uchun bu sabablar kamlik qiladi. Bu osonroq boʻlishi uchun magistraturada oʻqishning qanday afzalliklari va kamchiliklari borligini quyida keltirib oʻtamiz.

Magistraturaning afzalliklari

Yoʻnalishingiz boʻyicha chuqurroq bilimlar olish imkoniyati
Mutaxassisligingiz oʻzingizga yoqsa va bu borada chuqurroq bilimlar olishni istasangiz, magistraturada oʻqish haqida oʻylab koʻrishingiz kerak. Masalan, psixologiya sohasida bakalavriatni bitirgach, sport psixologiyasi boʻyicha magistratura yoʻnalishini tanlasangiz boʻladi. 
Sohangizga yaqin boshqa bir yoʻnalishni tanlash imkoniyati ham mavjud. Masalan, bakalavriatda psixologiya yoʻnalishida oʻqigan boʻlsangiz, sotsiologiya yoʻnalishi boʻyicha magistraturada oʻqishingiz mumkin. 
Magistratura iste’dodli talabalarga yangi imkoniyatlar ochadi.

Ilmiy ish yozishingiz mumkin
Fan sizni qiziqtirsa va bu borada oʻzingizni sinab koʻrmoqchi boʻlsangiz, magistratura bu borada yaxshi imkoniyatdir. Qoʻshimcha adabiyotlarni oʻrganish va ilmiy-tadqiqot ishi yozishingiz uchun yetarlicha vaqtingiz boʻladi.

Ta’lim va ishni birga olib borish mumkin
Magistrant – anchagina tajribali talaba degani. U oson oʻqishni, bir nafasda imtihonlarni topshirishni, shaxsiy ishlariga vaqt ajratishni oʻrganib olgan. Shuning uchun oʻqish davomida mashgʻulotlarni hamda qoʻshimcha ishni birga olib borish mumkin. Ham stipendiya olish, ham oylik olish imkoniyatingiz boʻladi.

Rezyumengiz uchun qoʻshimcha band
Ish qidirayotganingizda magistratura uchun sarflagan ikki yilingiz sizning foydangizga ishlashi mumkin. Ish beruvchi sizning diplomingizga qarab, qarshisida tor yoʻnalishni chuqur biladigan odam turganini anglaydi. Pedagogika singari alohida sohalarda magistratura avtomatik tarzda oʻqituvchining malakasini oshiradi va kategoriya beradi. Maktablarda bu foydalidir.

Talabalar turar-joyida yashash imkoniyati
Bu yoqimli afzalliklardan. Turar-joyga qanday toʻlov qilsam ekan, deb boshingizni ogʻritib yurmasdan, oʻqishingiz mumkin. Katta shaharda stipendiya bilan alohida kvartira xonasi uchun toʻlov qilish qiyinligini hamma biladi.

Magistraturaning kamchiliklari

Ba’zida ish topish qiyin
Magistraturaning ayrim yoʻnalishlarini bitirganda, ish topish oson boʻlmaydi. Chunki ushbu soha vakiliga talab boʻlmasligi mumkin. Shuning uchun, magistraturaga hujjat topshirishdan oldin, uni bitirgach ish topish imkoniyatlaringiz qay darajada ekanini surishtirib koʻring.

Ilmiy ishingiz amaliy jihatdan keraksiz boʻlsa, behuda vaqt sarflayotgan boʻlasiz
Ba’zida ilmiy ish xobbiga aylanishi mumkin. Mavzuingiz juda tor boʻlsa, tadqiqotingiz amaliy jihatdan foyda keltirmasa, ilmiy ish faqatgina shaxsiy rivojlanish va qoniqishga xizmat qiladi. Buni hisobga oling.

Magistraturaga topshirish kerak-kerakmasligini, albatta, siz hammadan yaxshiroq bilasiz. Imkoniyat va xohishlaringizni inobatga olgan holda, chuqur oʻylang va qaror qabul qiling. Omad yor boʻlsin!