Ўзбекистон Президенти Шавкат Мирзиёевни Қозоғистоннинг биринчи раҳбари Нурсултон Назарбоев ва Россия етакчиси Владимир Путин Ўзбекистон президентлигига қайта сайлангани билан табриклади.

“Россия ва Ўзбекистон ўртасидаги ҳар томонлама стратегик шериклик ва иттифоқчилик муносабатларини мустаҳкамлаш борасидаги принципиал йўлингизни юксак қадрлаймиз. Ишончим комилки, биргаликдаги саъй-ҳаракатлар икки томонлама алоқаларнинг барча кўлами бўйича ўзаро манфаатли ҳамкорликни изчил ривожлантириш, минтақавий ва халқаро масалаларда мувофиқлаштиришни таъминлайди”, дейилади Россия Президенти телеграммасида.

Маълум қилинишича, Қозоғистоннинг биринчи Президенти Ўзбекистон раҳбарини куни кеча мамлакатда бўлиб ўтган муддатидан илгари Президент сайловидаги ғалабаси билан самимий қутлаган.

Шунингдек, Ўзбекистон билан Қозоғистон ўртасидаги яхши қўшничилик, стратегик шериклик ва иттифоқчилик муносабатлари изчил ривожланиб бораётгани катта мамнуният билан қайд этилган.

“Бугунги кунда ҳамкорлик барча йўналишларда, шу жумладан савдо-иқтисодиёт, инвестиция, энергетика, транспорт-логистика, маданий-гуманитар ва таълим соҳаларида жадал ривожланиб бормоқда”, дейилади хабарда.

• Назарбаев
• Путин
• Шавкат Мирзиёев