Кремлда Владимир Путиннинг Россияга ишчи ташрифи билан келган Беларус Республикаси Президенти Александр Лукашенко билан учрашуви бўлиб ўтди.

Россия Президенти Владимир Путин беларус президенти Александр Лукашенконинг Украина билан Истанбулда келишилган келишувга қайтиш таклифига рози бўлди.

Беларус раҳбари Лукашенконинг таъкидлашича, Истанбулдаги музокаралар чоғида томонлар “олға силжиш”га эришган, аммо кейинчалик келишувлар бузилган. У Москванинг урушни тинч йўл билан тартибга солиш ташаббуслари “Украинада жавоб топишига” ишонч билдирди ва бу йўналишда Путин билан ҳамкорлик қилиб, елкама-елка туришга тайёрлигини айтди.

“Бир пайтлар менга кўрсатган ва топширган ҳужжатни олиб, столга қўйиш ва у бўйича ҳаракатланиш керак”, — деди Беларус раҳбари.

“Ҳа ва у билан ишлаш керак”, — деди Путин.
Лукашенко мазкур ҳужжатда “Украина учун ҳам мақбул позиция” акс этгани ва улар бунга рози бўлишганини айтди.
“Улар рози бўлишган, албатта”, — дея қўшимча қилди Путин.

Украинада уруш бошланганидан кейин Россия ва Украина делегациялари музокараларнинг бир неча раундини, жумладан, Истанбулда ҳам ўтказди. Россия томондан музокарачилари раҳбари, президент ёрдамчиси Владимир Мединский томонлар муваффақиятга эришганини айтди.

“Киев бошқа нарсалар қаторида хавфсизлик кафолатлари эвазига Украинага нейтрал мақомини таклиф қилди”, — деди у.

Истанбулдаги учрашув 29-март куни бўлиб ўтганди. Унинг якунлари бўйича Россия делегацияси раҳбари Владимир Мединский Украина “Россиянинг фундаментал талабларини бажаришга тайёрлигини эълон қилганини” айтган. Талаблар орасида Украинанинг НАТОга аъзо бўлишдан бош тортиши ва ҳудудига хорижий ҳарбий базаларни жойлаштирмаслиги ҳам бор эди.

• Беларусь
• Эрдоған
• Истанбул
• Kiyev
• Лукашенко
• Путин
• Россия
• Туркия
• Украина
• Зеленский