Тошкентда бўлиб ўтаётган “Иннопром: Марказий Осиё” иккинчи халқаро саноат кўргазмасида Россиянинг “Металлоинвест” компанияси раҳбари Нозим Эфендиев Ўзбекистон ҳукуматидан Ўзбекистондан темир йўлда юк ташиш тарифларини пасайтиришни сўради. У тарифларни “адолатли” ва тенг қилиб белгилаш лозимлигини таъкидламоқда. Ўзбекистон томони бу масалани кўриб чиқишга ваъда берган.

 “Металлоинвест” 2022 йилда Тошкент металлургия заводига капитал киритиш билан Ўзбекистон бозорига кириб келган. Компания Ўзбекистон Тикланиш ва тараққиёт жамғармаси билан биргаликда ишлаб чиқаришни бошқаради.

Эфендиев “Иннопром”даги чиқишида Ўзбекистоннинг “улкан имкониятларга эга” экани, бироқ денгиз портлари ва йирик савдо бозорлардан узоқдалиги сабаб “айрим логистика масаласидаги муаммолар мавжудлиги”га тўхталиб ўтган.

“Россия, Қозоғистон ва Ўзбекистон ўртасида тенглаштирилган тариф йўқ. Биз Россия ҳудуди орқали арзон тарифда, Қозоғистонга келганимизда – қимматроқ тарифда ва Ўзбекистонга ўтганимизда, ҳатто, янаям қимматроқ тарифда юк ташишга мажбурмиз.

Мен адолатли ва бир хил тариф бўлишини истайман. Бу россиялик ишлаб чиқарувчиларни бу ерга олиб келишга ундайди”, – дейди компания раҳбари.

Нозим Эфендиев, шунингдек, “Ўзбекистон темир йўллари” АЖ раҳбарлари билан учрашувда ушбу масалани муҳокама қилмоқчи.

Ўз навбатида, Ўзбекистон инвестициялар ва ташқи савдо вазири Сардор Умурзоқов мамлакат расмийлари муаммони ўрганаётганини айтди.

• Иннопром
• Кўргазма
• Ўзбекистон темир йўллари
• Поезд
• Россия