Ўзбекистоннинг Бангкок шаҳридаги Бош консуллиги ходимлари Таиландга ишга бориб, одам савдоси қурбонига айланган уч нафар ватандошимизга ёрдам кўрсатди.

Бош консулликка 19 ёшли юртдошимиз Ж.М. одам савдоси қурбонига айлангани ва Таиланд ҳудудида яшаш учун турар-жой ҳамда маблағсиз қолгани юзасидан мурожаат қилган.

Фуқаронинг аризаси асосида Таиланд полицияси билан ҳамкорликда дастлабки суриштирув ишлари ўтказилган ва 3 нафар гумондор аниқланиб, улардан бири Таиланд ҳудудини тарк этмоқчи бўлган вақтда Бангкокдаги Суварнабхуми халқаро аэропортида ҳибсга олинди. 2 нафар шахсга нисбатан қидирув-суриштирув ишлари давом этмоқда.

Шунингдек, тергов давомида яна 2 нафар Ўзбекистон фуқароси одам савдоси қурбони сифатида мажбурий меҳнат билан шуғулланишга мажбурлангани аниқланди.

Ҳозирда Бош консулхона томонидан барча Ўзбекистон фуқароларига ҳомий ташкилотлар билан ҳамкорликда вақтинча турар-жой, озиқ-овқат, кийим-кечак ва ватанга қайтишлари учун авиачипта олишда ёрдам кўрсатилмоқда.

Ўзбекистон Бош консулхонаси ватандошларимизни Таиландга сафар қилишдан олдин ёлғон ваъдаларга алданиб қолмасликка, осон иш топишга оид таклифларга ишонмасликка ҳамда ушбу мамлакатга кириш ва унда бўлиб туриш чоғида маҳаллий қонунчилик талабларига қатъий риоя қилишга чақиради.

• Tailand