21 апрель куни Тошкент шаҳри 45 давлатдан 5 мингга яқин ҳаваскор югурувчи ва профессионал спортчиларни VI BYD Тошкент халқаро марафонида қабул қилди.

Марафон ташкилотчилари сифатида Тошкент шаҳар ҳокимлиги, Ўзбекистон Республикаси Спорт вазирлиги, Олий таълим, фан ва инновациялар вазирлиги, “Ўзбекнефтгаз” АЖ, Миллий олимпия қўмитаси, Ўзбекистон Мудофаа вазирлиги, Ички ишлар вазирлиги, Ёшлар ишлари агентлиги, Касаба уюшмалари федерацияси, Фавқулодда вазиятлар вазирлиги, ҳамда Ўзбекистон Енгил атлетика федерацияси иштирок этди.

Ўзбекистон Республикаси енгил атлетика Федерацияси Марказий Осиё енгил атлетика ассоциацияси билан биргаликда спорт тадбирининг координатори сифатида олтинчи маротаба иштирок этди.

VI BYD Тошкент халқаро марафони дастурига 4 та масофа: 3 ва 10 км оммавий югуриш мусобақаси, ярим марафон ва марафон масофаси киритилган.

Марафоннинг умумий мукофат жамғармаси 720 млн сўмни ташкил этди. Бунда: марафон иштирокчилари 1 ўрин учун — 60 млн сўм, 2 ўрин учун — 40 млн сўм, 3 ўрин учун — 30 млн сўм, 4 ўрин учун — 20 млн сўм, 5 ўрин учун — 16 млн сўм, 6 ўрин учун — 10 млн сўм пул мукофоти билан тақдирланди.

Ярим марафон иштирокчилари: 1 ўрин учун — 35 млн сўм, 2 ўрин учун — 25 млн сўм, 3 ўрин учун — 20 млн сўм, 4 ўрин учун — 16 млн сўм, 5 ўрин учун — 12 млн сўм, 6 ўрин учун — 8 млн сўм пул мукофоти билан тақдирланди.

10 км масофага югуриш иштирокчилари: 1 ўрин учун — 9 млн сўм, 2 ўрин учун — 6 млн сўм, 3 ўрин учун — 3 млн сўм пул мукофоти билан ва 3 км масофага югуриш мусобақаси ғолиб ва совриндорлари қимматбаҳо совғалар билан тақдирланди.

Ярим марафонда энг яхши натижа кўрсатган Париж Олимпия ўйинлари лицензиати Шоҳруҳ Давлатов ва марафонда энг яхши натижа қайд этган маҳоратли спортчи Екатерина Тунгусковалар BYD автомашиналарини қўлга киритди.