Кеча, 13 декабр куни маҳаллий вақт билан соат 10:29 да Венгриянинг “WizzAir” авиакомпаниясига тегишли самолёт Самарқанд халқаро аеропортига келиб қўнди. Бу ҳақда “Uzbekistan Airports” хабар берди.

“Ўзбекистонга янги: Абу-Даби – Самарқанд – Абу-Даби парвоз йўналишини очган “Airbus A321” нео самолёти анъанага кўра сув аркаси, экипаж аъзолари ва 141 нафар йўловчи карнай ва сурнай садолари билан кутиб олинди”, – дейилади хабарда.

Қайд этилишича, тўғридан-тўғри мунтазам рейслар ҳафтасига икки марта – сешанба ва шанба кунлари амалга оширилиши режалаштирилган.

Эслатиб ўтиш мумкин, 2023 йилнинг 25 январидан бошлаб “WizzAir” Тошкент аеропортига ҳафтасига уч марта – душанба, чоршанба ва жума кунлари парвозларни бошлашни режалаштирган.

Маълумот учун, “WizzAir” – Венгриянинг арзон авиакомпанияси бўлиб, штаб-квартираси Будапештда (Венгрия) жойлашган.

• Абу-Даби
• Аэропорт
• Самарқанд