Бу ҳақда New York Times нашри Greenpeace ташкилоти ҳисоботига таяниб хабар бермоқда.

“Охирги уч ой ичида Россия Азов денгизи бўйлаб Мариупол ва Бердянск шаҳарлари ўртасида тахминан 80 км электр узатиш линиясини қурди”, – деб ёзади нашр. Бу Greenpeace томонидан қўлга киритилган сунъий йўлдош тасвирлари орқали маълум бўлган. Электр узатиш линиясининг бу қисми Мариупол яқинидаги электр подстанциясига олиб боради, ушбу подстанция эса Запороже АЭС билан боғланган. АЭС подстанциядан тахминан 220 км ғарбда жойлашган.

Greenpeace таҳлилчиси Шон Бернининг фикрича, бу — Россия АЭСни қайта ишга тушириш ва уни ўз манфаати йўлида фойдаланишни режалаштираётганини кўрсатувчи илк жиддий далил ҳисобланади. АЭС Россиянинг Ростов вилояти энергетика тизимига уланиши мумкин.

The New York Times нашрининг ёзишича, бу тарихда илк марта бир давлат уруш натижасида бошқа давлатдан тортиб олган ядровий иншоотни ўз фойдаси учун ишлатиши бўлиши мумкин.

• АЭС
• Россия
• Украина