Янги йил келиши билан экранларимизда биз севиб томоша қиладиган, янги йил шукуҳини берадиган кино ва мультфильмлар бошланади. Болалик хотиралари, қиш завқи, эзгулик ғалабасига йўғрилган кино-филмларни биргаликда томоша қиламиз.

“Уйда ёлғиз”

1990 йили катта экранларга чиққан фильм ўттиз йилдан ошибдики, мухлисларини йўқотгани йўқ. Крис Колумбус режиссёрлигида суратга олинган картинада Мак Калкин бош ролни ижро этган. Унинг иккинчи қисми ҳам довруғ қозонган. Саккиз яшар боланинг икки ўғрини чув тушириш йўллари юморга бой бўлиб, асар замирида оила муқаддаслиги ғояси илгари сурилган.

Доналд Трамп “Уйда ёлғиз” фильми ютуғига ўзини сабабчи қилиб кўсатмоқда

АҚШнинг собиқ раҳбари ва келаси йил президентликка номзод Доналд Трамп “Уйда ёлғиз 2” фильмида роль ижро этганини билармидингиз. Донал Трамп ўз ижтимоий тармоғида 20 йил аввал уни “Уйда ёлғиз 2” фильмига таклиф қилишганини эслаб пост қўйди. Унинг сўзларига кўра у ролни ишлари кўп бўлгани боис дастлаб рад этган. Бироқ кейин рози бўлган.

Аслида ушбу фильм режиссёри Крис Колумбнинг айтишича Трамп фильмда роль ижро этиши эвазигагина меҳмонхонасида суратга олишга рухсат беришини айтган.
Трамп иштирок этган кадр бир неча сонияларни ташкил қилади. Болакай Кевин Маккаллистер ундан қабулхонага йўналишни сўрайди ва у йўналишни кўрсатиб юборади. Трампнинг фильмда иштироки кино мувафаққиятга сабабчи бўлганини қайд этиб ўтган.

“Қор маликаси”

Қор маликаси - қишнинг энг оммабоп ва қизиқарли мультфильми. Ушбу мультфильм Ханс Кристиан Андерсеннинг машҳур эртаги асосида ишланган. Рус режиссёри Лев Атаманов 1957 йили яратган картинада яхшилик ва ёмонлик кураши тавсирланади. Герданинг Қор маликаси ўғирлаб кетган укаси Кайни қутқариш йўлидаги саргузаштлари баён этилади. Юраги музлаб қолган болакайни меҳр кўз ёшлари билан ўзига қайтарган қизалоқ алал оқибат Қор маликасини енгади. Воқеалар, табиийки, қиш фаслида, қаҳратонда юз беради. Буғу, қароқчи қиз образлари ҳам мухлисларда ёрқин таассурот қолдиради. Оила даврасида ёш-у қарини бирдек кўришга чорловчи севимли мультфильмларимиздан бири.

“Тақдир ҳазили ёки қушдек енгил бўлинг!”

Режиссёр Элдар Рязанов ишлаган фильм илк томошадаёқ 100 миллион мухлис йиққан. Бош ролларни Андрей Мягков ва Барбара Брилска ижро этган. Мухлислар талаби билан 2007 йили картинанинг мантиқий давоми ҳам ишланди, унда кексайган қаҳрамонларимизнинг фарзандлари ичакузди саргузаштларни бошдан кечиришади. “Тақдир ҳазили...”даги дилтортар қўшиқларни Сергей Никитин ва Алла Пугачёва куйлаган.

“Қарсилдоқ”

Гофман эртаклари ва машҳур бастакор Чайковский балети асосида Союзмултфилм студиясида Борис Степансев томонидан яратилган (1973). Асарда қўғирчоқ қарсилдоқ ва қизалоқнинг дўстлиги тавсирланади. Каламушлар ҳужумига қарши курашда эзгулик ғолиб чиқади. Мультфильм Испанияда “Болалар ва ўсмирлар фильмлари” танловида биринчи ўринни олган.

“Соҳибжамол ва махлуқ”

Уолт Диснейнинг ушбу анимасион фильми француз эртаклари асосида ишланган. 1991- йили мусиқали мелодрама жанрида суратга олинган асар йилнинг машҳур учлигида “Терминатор 2” ва “Робин Гуд”дан кейинги поғонани забт этган. 1997 йили яратилган иккинчи қисмида Янги йилни нишонлаш мавзуси тасвирланади. Самимий гўзал қиз Беллнинг махлуқ қиёфасидаги шаҳзодага кўнгил қўйиши орқали сурат эмас, сийрат муҳимлиги таъкидланади.

«Ы» операцияси ёки Шурикнинг бошқа саргузаштлари

Леонид Гайдай 1965 йили ишлаган картина ўша йилиёқ 69 миллион мухлис олқишига сазовор бўлган. Мана, эллик йилдирки, юз миллионлаб инсонлар учун ҳамон суюмли. Янги йил арафасида юз берган воқеалар, сохта ўғирликка тушган уч қаҳрамонга Шурик тўсқинлик қилиши... фильм сюжетини айтмасак ҳам, ўзингиз биласиз.

• Байрам
• Кино
• Мултфильм
• Янги йил