AOKAda o‘tkazilgan brifingda “Mahalla” xayriya jamoat fondi axborot xizmati rahbari Hasan Salomov 2022-yilda amalga oshirilgan ishlar yuzasidan ma’lumot berdi.

Qayd etilishicha, 2022-yilda jami 16 mingdan ziyod kam ta’minlangan oilaga qariyb 8 milliard so‘m miqdorida moddiy yordam ko‘rsatilgan.

Jumladan, 1000 nafardan ziyod fuqarolarga sog‘lig‘ini tiklash uchun salkam 1 milliard so‘m mablag‘ yo‘naltirilgan bo‘lsa, 87 nafar fuqaroga nogironlik aravachasi, 14 kishiga esa ortopedik moslamalar olib berilgan. Shuningdek, 26 nafar vatandoshimizning murakkab jarrohlik amaliyotini o‘tkazishlari uchun malbag‘ ajratildi.

O‘tgan yilda aholi bandligini ta’minlashga ham alohida e’tibor qaratilib, 562 nafar insonga tikuv mashinalari, 153 nafariga esa maishiy texnika vositalari olib berilgan.

Shuningdek, fond mablag‘lari hisobidan yo‘naltirilgan 4 milliard 200 million so‘m mablag‘dan 2700 fuqaroga kiyim-kechak, 7000 dan ziyod aholiga oziq-ovqat, 1000 nafar kishiga xo‘jalik mollari hamda 2000 ga yaqin oilaga naqd pul ko‘rinishidagi moddiy yordamlar tarqatilgan.

“Har bir mahallaga kitob” loyihasi asosida bugungi kungacha 5000 mingdan ziyod mahallaga 3 milliard so‘mlik kitoblar tarqatildi. Shuningdek, o‘tgan yilda 274 ta mahallaga mebel jihozlari, 330 mahallaga esa kompyuter jamlanmalari tarqatilgan. Buning uchun fond mablag‘lari hisobidan 3 milliard 200 million so‘m mablag‘ yo‘naltirilgan. Bundan tashqari, o‘tgan yilda 3000 ga yaqin mahalla idoralari xodimlariga 9 milliard so‘m bir martalik moddiy yordamlar ajratilgan.

• AOKA
• Kitob
• Mahalla