Ijtimoiy tarmoqlar orqali Chorvoq suv omboriga kanalizasiya suvlari oqib tushayotgani haqida e’lon qilingan xabar yuzasidan Davlat ekologiya qo‘mitasi raisi Narzulla Oblomurodov boshchiligidagi ishchi guruh tomonidan Toshkent viloyati Bo‘stonliq tumanida o‘rganish o‘tkazildi. Bu haqda qo‘mita axborot xizmati xabar berdi.

Qayd etilishicha, Toshkent tabiatni muhofaza qilish prokuraturasi bilan hamkorlikda o‘tkazilgan o‘rganishlar davomida Bo‘stonliq tumani Novobod mahallasidagi “Chorbog‘ oromgohi”ning yuqori hududida “Chimgonsoy” soyidan oqib o‘tuvchi suvlar avtomobil yo‘lining tag qismidagi quvur orqali suv omboriga quyilayotgangani aniqlangan va xabarda keltirilgani kabi suv omboriga maishiy va ishlab chiqarish suvlari oqizilmayotgani ma’lum bo‘lgan.

Shundan so‘ng mutaxassislar tomonidan laboratoriya tahlili uchun suvdan namunalar olingan.

Ishchi guruh tomonidan Chorvoq suv ombori atrofida joylashgan xizmat ko‘rsatish ob’yektlari, tadbirkorlik sub’yektlari, jumladan, mehmonxonalar, pansionatlar va boshqa aholi dam olish maskanlarining oqova suvlarni tozalash holati, shuningdek, Bo‘stonliq tumanida aholi va turistlar uchun qulay sharoitlar yaratish, mavjud infrastrukturani yanada yaxshilash, chiqindi to‘plash shoxobchalari va chiqindi qutilari tarmog‘ini kengaytirish masalalari o‘rganilmokda.

• Chorvoq
• Toshkent