“Markaziy Osiyo davlatlari va Yevropa Ittifoqi o‘zaro munosabatlarni strategik sheriklik darajasiga olib chiqmoqchi. Bu ikki mintaqaning birinchi sammiti yakunlari bo‘yicha juma kuni qabul qilinadigan Samarqand deklaratsiyasida ko‘zda tutilgan”, – deydi O‘zbekiston prezidenti matbuot kotibi Sherzod Asadov.

Uning ta’kidlashicha, ushbu deklaratsiya konstruktiv muloqotni kengaytiradi va barcha yo‘nalishlardagi hamkorlikka kuchli sur’at bag‘ishlaydi.

Sammitning asosiy tadbirlari oldidan O‘zbekiston prezidenti Shavkat Mirziyoyev Yevropa kengashi prezidenti Antoniu Koshta va Yevropa komissiyasi prezidenti Ursula fon der Lyayen bilan uchrashuv o‘tkazgan.

Muzokaralarda asosiy e’tibor innovatsiyalar, “yashil” energetika, tog‘-kon tarmog‘i, qishloq xo‘jaligi, transport, logistika, raqamlashtirish va boshqa yo‘nalishlarda qo‘shma dastur va kooperatsiya loyihalarini ilgari surishga qaratilgan. Bundan tashqari, turizm, madaniyat, fan, ta’lim va sog‘liqni saqlash sohalaridagi faol almashinuvlarni davom ettirish muhimligi qayd etilgan.

Sherzod Asadovning ta’kidlashicha, O‘zbekiston va Yevropa Ittifoqi o‘rtasidagi tovar ayirboshlash hajmi 6 mlrd yevrodan oshgan.

• Samarqand
• Yevropa Ittifoqi
• sammit