O‘zbekiston Respublikasi energetika vazirligi tizimida faoliyat yurituvchi “O‘zbekiston milliy elektr tarmoqlari” aksiyadorlik jamiyati 2019-yil 1-dekabr sanasidan boshlab “Turkmenenergo” davlat elektr energetika korporatsiyasidan elektr energiyasini import qilib kelmoqda. 

 “O‘zbekiston MET” AJ Axborot xizmatining ma’lum qilishicha, bugun, 10-yanvar kuni soat 19:03da Turkmaniston energetika tizimidagi “Mari” issiqlik elektr stansiyasining ikkita energoblogida kichik texnik nosozlik yuzaga kelib, O‘zbekistonga eksport amaliyoti vaqtincha to‘xtatildi. 

“Mari” IESda ro‘y bergan nosozlik tufayli O‘zbekiston energetika tizimida avariyaga qarshi avtomatika ishlab, yuqori kuchlanishli elektr ta’minoti tizimining Farg‘ona vodiysi qismida 600 mVt atrofida quvvatga ega iste’molchilar vaqtincha tarmoqdan uzilgan.

Ayni paytda “Mari” IESda energobloklarni qayta ishga qo‘yish bo‘yicha choralar ko‘rilmoqda. Nosozliklar bartaraf etilgach, bugun, taxminan soat 21:00ga qadar import amaliyoti tiklanadi. Bunga qadar elektr ta’minotida imkon qadar cheklovlarni oldini olish maqsadida zaxira quvvatlar ishga solinganini ma’lum qilamiz.

 Ma’lumot o‘rnida: joriy rejimlarda Turmanistondan soatiga 780 mVt quvvatda elektr energiyasi import qilinayotgan edi.