Bugungi kunda hayotimizni elektr energiyasisiz tasavvur qila olmaymiz. Hozirda energiya quvvatini tabiiy sharoitdan olishga ko‘proq e’tibor qaratilmoqda. Buni qarang-ki, birinchi GES yaratilganiga bir asrdan ham oshibdi. 

1882-yil 30-sentyabr kuni Amerikaning Viskonsin shtatidagi kichik Aplton shahrining Vulkan ko‘chasida Edison dunyodagi birinchi gidroelektrstansiyani tashkil qilgan. Foks daryosida yaratilgan GES 12,5 kVt quvvatga ega bo‘lgan ekan. 

O‘sha yerlik Rojersga tegishli bo‘lgan qog‘oz fabrikasi Amerika gidroinshootiga aylangan. Tomas Edison fabrikaga suv harakatini boshqaradigan g‘ildirakli Dinamo mashinasini o‘rnatib, o‘z uyi, zavodi va qo‘shni binolarni yoritish uchun zarur bo‘lgan energiyani suvdan olishga muvaffaq bo‘lgan. Bu yangilik tez orada muvaffaqiyatga erishadi, gazetalar u haqda yoza boshlashadi.

Shundan buyon butun dunyo suvning yana bir qimmatli “xizmat”idan foydalanib kelmoqda. 

Oʻzbekistonda elektrlashtirish ishlari XX asrning ikkinchi choragidan boshlangan. Hozirda Chirchiq, Chorvoq, Farhod, Boʻzsuv, Solor, Samarqand, Toʻpalang GES kabi bir qancha elektr stansiyalari faoliyat yuritmoqda.

O‘zbekiston Respublikasi Prezidentining 2017-2021-yillar uchun “Gidroenergetikani rivojlantirish dasturi to‘g‘risida”gi qarorida 42 ta yangi GES (gidro elektr stansiyalar) qurish va 32 ta ishlab turgan GESlarni zamonaviylashtirish rejalashtirilgan.