Kecha, 11-fevral kuni Axborot va ommaviy kommunikatsiyalar agentligida Qurilish vazirligi tomonidan matbuot anjumani tashkil etildi. Bo‘lib o‘tgan tadbirda sohaga axborot-kommunikatsiya texnologiyalarini keng joriy etish borasida amalga oshirilayotgan ishlar xususida ham so‘z bordi. 

Qayd etilishicha, hozirda vazirlik tomonidan qurilish ishlarida yangi texnologiyalar asosida ish boshlab yuborilgan. Lekin sohada haligacha qator kamchiliklar kuzatilmoqda.

Shuningdek, “Qishloq qurilish invest” tomonidan qilinayotgan ishlar keng jamoatchilikka yoritilmay kelingani tanqid ostiga olindi. 
– Barcha qilayotgan ishlarimizda kamchilik bor. Qurilishda ishlaydigan ishchilar yo‘l qo‘yayotgan kamchiliklar turli muamolarga sabab bo‘lmoqda. Endilikda ularni o‘qitib, soha bo‘yicha bilim berishni yo‘lga qo‘yamiz. Bular bir kunda hal bo‘ladigan ishlar emas. Biz bu sohada 20 yil bir joyda uyquda edik, kelinglar bizga yana 2 yil beringlar o‘zimizni ko‘rsatamiz, - dedi Toshkent shahar qurilish sohasidagi hududiy nazorat inspeksiyasi bosh inspektori Alijon Soatov.

Matbuot anjumanida so‘nggi yillarda respublika bo‘yicha juda ko‘p qurilish ishlari amalga oshirilgani va bu jarayonda ko‘plab baxtsiz hodisalar ham kuzatilgani haqida ham fikrlar eshitildi.

– Oxirgi uch yil ichida qurilish sohasida jami 302 ta baxtsiz qoidalar qayd etilgan. Baxtsiz hodisa oqibatida 119 nafar ishchilar vafot etgan, 117 nafari turli xildagi og‘ir tan jarohatlari olib, mehnatga yaroqsiz bo‘lib qolgan. Agar ishlayotgan ishchilar sug‘urta qilingan bo‘lsa, ish beruvchi tomonidan ularga bir oy ichida kompensatsiya pullari to‘lab berilishi shart, - dedi Mehnatni muhofaza qilish bo‘yicha davlat mehnat inspektori Nozima Sulaymonova.