Toshkent vrachlar malakasini oshirish instituti Tibbiyot xodimlarini kasbiy malakasini rivojlantirish markazi etib qayta tashkil etiladi hamda Toshkent shahridagi 1-son Respublika klinik shifoxonasi negizida Markazning ko‘p tarmoqli klinikasi tuziladi. 

Bu haqda davlat rahbarining “Tibbiy-sanitariya sohasida kadrlarni tayyorlash va uzluksiz kasbiy rivojlantirishning mutlaqo yangi tizimini joriy etish chora-tadbirlari to‘g‘risida”gi qarorida belgilab berildi.

Shu bilan birga, tibbiyot oliy ta’lim muassasalari mavjud bo‘lmagan hududlar (Jizzax, Qashqadaryo, Navoiy, Namangan va Sirdaryo viloyatlari)da hududiy ko‘p tarmoqli kattalar va bolalar tibbiyot markazlarida mazkur Markazning filiallari ochiladi.

Ahamiyatli tomoni, Markazda 2021-yilgi O‘zbekiston Respublikasining ijtimoiy va ishlab chiqarish infratuzilmasini rivojlantirish dasturi mablag‘lari hisobidan xalqaro standartlarga javob beradigan o‘quv-simulyatsion markazi tashkil qilinadi.

Shuningdek, 2021-yil 1-yanvardan boshlab shifokorlar uchun har 5 yilda malaka toifasini olish bo‘yicha majburiy attestatsiyadan o‘tish tartibi kiritiladi hamda ularga qulaylik yaratish va shaffof o‘tkazilishini ta’minlash uchun attestatsiyani onlayn tartibda audio va videokuzatuv ostida tashkil etish tizimi joriy etiladi. 

Birlamchi tibbiy-sanitariya yordami muassasalari tibbiyot xodimlarini attestatsiyadan o‘tkazish uchun to‘lov ham bekor qilinadi.