Ўзбекистон апрель ойи якунлари бўйича яна дунёдаги энг йирик олтин сотувчиси бўлди. Бу ҳақда Жаҳон олтин кенгаши хабар берди.

Ўтган ой жаҳон Марказий банклари жами 12 тонна олтин сотиб олдилар, бу март ойига нисбатан 12 фоизга камайди ва ўтган йилги ўртача кўрсаткичдан анча паст. 

Таҳлилчилар талабнинг пасайишини йил бошида рекорд даражага этган олтин нархларининг кўтарилиши билан боғлашди. Жаҳон олтин кенгаши таъкидлашича, Марказий банкларнинг қарорлари кўпинча стратегик хусусиятга эга, нархлар бозордаги фаолиятни вақтинча совутиши мумкин.

Апрель ойида энг катта харидни Полша миллий банки амалга оширди. Унинг захиралари 12 тоннага тўлдирилиб, 509 тоннага етди, бу ҳатто Европа Марказий банкининг (507 тонна) захираларидан ҳам ошиб кетди. Йил бошидан бери Полша 61 тонна олтин сотиб олди.

Шунингдек, йирик харидорлар рўйхатига Чехия (3 тонна), Хитой, Туркия, Қирғизистон (2 тонна), Қозоғистон ва Иордания (бир тонна) Марказий банклари киритилган.

Бошқа давлатлар захираларни кўпайтираётган бир пайтда, Ўзбекистон уларни сотишда давом этмоқда. Апрель ойида Ўзбекистон яна 11 тонна олтин сотди ва кетма-кет учинчи ой давомида сотувлар бўйича етакчи бўлиб қолди. 

• Олтин
• Ўзбекистон