Садир Жапаров собиқ давлат раҳбари Алмазбек Атамбаевга нисбатан чиқарилган суд қарорига изоҳ берар экан, уни афв этишга тайёрлигини айтди. У бу ҳақда “Кабар” ахборот агентлигига берган интервьюсида маълум қилди.

Садир Жапаров суд қарорларига аралашмаганини ва аралашмоқчи ҳам эмаслигини таъкидлаб, суднинг қарори қандай бўлишидан қатъий назар, унга бўйсуниш кераклигини айтди.

“Агар суд томонидан чиқарилган қарорни ноқонуний деб ҳисобласангиз, юқори инстанцияларга мурожаат қилинг, Олий суд нуқта қўйсин. Суд қарорини ҳеч ким ўзгартира олмайди. Менинг ҳам бунга ҳаққим йўқ”, — деди у.

Шу билан бирга, Жапаров Атамбаев мамлакатга қайтган тақдирда, ҳибсга олиниши ёки олинмаслиги ҳақида гапирар экан, ўзининг афв этиш ҳуқуқи борлигини эслатди.

“Менинг бошқа бир ҳуқуқим бор — амнистия ҳуқуқи. Агар тегишли ариза билан мурожаат қилишса, амнистия беришим мумкин. Кой-Таш воқеасидан буён олти йил ўтди. Эҳтирослар аллақачон босилган. Менимча, судлар бунчалик қаттиқ бўлмаслиги ҳам мумкин эди. Албатта, бу менинг судларга тиқиштирадиган фикрим эмас, балки шахсий, фуқаролик фикрим. Менимча, пробация ёки жарима билан чекланишса яхши бўларди”, — дея қўшимча қилди амалдаги президент.

Маълумот учун, Атамбаев 2023 йил февралида даволаниши учун Испанияга кетган ва ўшандан бери Қирғизистонга қайтиб келмаган.

• Авф
• Japarov
• Президент
• Қирғизистон