Кеча, 15 декабрь куни Бухоро, Наманган ва Хоразм вилоятларида умумий қуввати 500 МВт бўлган 3 та қуёш фотоэлектр станциясини қуриш ва улардан фойдаланиш бўйича ўтказилган тендер танловларида ғолиб инвесторлар аниқланди.

Мазкур лойиҳа Халқаро молия корпорацияси кўмагида “умумий қуввати 1000 МВт бўлган қуёш фотоелектр станциялар қуриш лойиҳаларини ишлаб чиқиш ва маслахат хизматларини кўрсатиш Дастури” (“IFC Scaling Solar program”) доирасида амалга оширилмоқда.

3-босқичда Бухоро, Наманган ва Хоразм вилоятларида умумий қуввати 500 МВт бўлган 3 та қуёш фотоэлектр станцияларини қуриш лойиҳаси амалга оширилган.

Мазкур лойиҳа бўйича тендернинг 1-босқичи (РФҚ) 2021-йил 31 августда ўтказилиб, ундан 11 та халқаро компания муваффақиятли ўтдиган. 2-босқич (РФП) эса 2022-йил 11 ноябрда якунланиб, 11 та компания орасидан 4 та компания белгиланган муддатгача таклифларини тақдим этган. Булар:

1. “Abu Dhabi Future Energy Company” – “Masdar” (БАА) – 3 та лойиҳага;
2. “Alarko Holding AS” (Туркия) – ўрта ва кичик лойиҳага;
3. “GD Power” – “Powerchina” консорциуми (Хитой) - 3 та лойиҳага;
4. “Voltalia SA” (Франция) – кичик лойиҳага.

“Ушбу лойиҳа Ўзбекистон ҳукумати томонидан хусусий молиялаштириладиган ва бошқариладиган қайта тикланувчи энергетика лойиҳаларини ривожлантириш орқали яшил энергия ишлаб чиқаришни кўпайтиришга қаратилган саъй-ҳаракатларнинг бир қисмидир. Шунингдек, бу мамлакатимизга аҳоли манфаатлари учун энергия манбалари нархларини пасайтириш, қазиб олинадиган ёқилғига қарамлигини камайтириш ва энергия ишлаб чиқаришда атмосферага зарарли чиқиндиларни камайтириш бўйича умумий мақсадларимизга эришишга хизмат қилади”, – деди Энергетика вазири Жўрабек Мирзамаҳмудов тендер танловида ғолиб инвесторларни аниқлашга бағишланган маросимда.

Молия вазири Темур Ишметовга кўра, авваллари давлат бюджети ёки давлат қарзи ҳисобига қурилаётган электр станциялар сўнгги йилларда хусусий маблағлар ҳисобига қурилмоқда. 2022 – 2026 йилларга мўлжалланган Янги Ўзбекистоннинг тараққиёт стратегиясида ДХШ тамойиллари асосида 14 млрд. долларлик лойиҳаларни, жумладан энергетика соҳасида 3,2 млрд. долларлик 9 та лойиҳалар амалга оширилиши кўзда тутилган. 2023 йилда яна иккита лойиҳа – қуёш ва шамол станциялари бўйича тендерлар якунланиши кутилмоқда. Ушбу лойиҳалар тараққиёт стратегияси ҳаётга изчил татбиқ этилаётганини англатади".

Танлов натижаларига кўра:

“Masdar” компанияси Бухоро вилоятида 250 МВт қувватга эга лойиҳа учун ишлаб чиқарилган бир киловатт-соат электр энергиясини 3,044 АҚШ центи миқдорида таклифи билан ғолиб деб топилди.

“GD Power-Powerchina” консорциуми Наманган вилоятида 150 МВт қувватга эга лойиҳа учун ишлаб чиқарилган бир киловатт-соат электр энергиясини 4,828 АҚШ центида етказиб бериш таклифи билан ғолиб, деб топилди.

“Voltalia SA” компанияси Хоразм вилоятида 100 МВт қувватга эга лойиҳа учун ишлаб чиқарилган бир киловатт-соат электр энергиясини 2,888 АҚШ центида етказиб бериш таклифи билан ғолиб деб топилди.

Ғолиб бўлган инвесторлар қуёш фотоелектр станцияларини лойиҳалаш, молиялаштириш, қуриш, фойдаланиш ва техник хизмат кўрсатиш билан шуғулланади.

Ғолиблар билан давлат-хусусий шериклик тўғрисидаги ва давлат томонидан қўллаб-қувватлаш тўғрисидаги битимларни 2023 йилнинг 1-чорагида имзолаш ва қурилиш ишларини 2023 йилнинг 4-чорагида бошлаш хамда 2024 йилнинг 4-чорагида ушбу станцияларни ишга тушириш режалаштирилган ва муҳокамалар давом эттирилади.

• Электр энергияси
• Энергетика_вазирлиги
• Инвестиция
• Молия