Шу кунларда айрим тижорат банкларида талабаларнинг тўлов-контрактларини қабул қилишда қўшимча комиссия ундирилаётгани айтилмоқда. Жумладан, “Капиталбанк” АТБ ҳамда “Ориент финанс банк” ХАТБда 0,5 фоиз миқдорида, “Агробанк” АТБда эса 2 фоиз миқдорида қўшимча тўлов талаб қилишмоқда.
Таҳририятга йўлланган мурожаатлардан бирида айтилишича, “Агробанк” масъуллари мазкур ҳолатни тўловнинг қисқа муддатда ўқув муассасаси ҳисоб рақамига ўтказиб берилиши билан изоҳлаган. Мурожаатчи шунингдек, кўз олдида талабанинг отаси фарзандининг ўқиши учун 10 миллион сўм миқдорида тўлов қилгани ва банк хизматлари учун қўшимча 200 минг сўм тўлов қилганини ёзади.
Шу ўринда савол туғилади: бу фарзандининг ўқиши учун бор-будини йиғиб келиб, тўлов қилаётган ота-оналарни куппа-кундузи шилиш эмасми? Бу қанчалик қонуний асосга эга?
Xabardor.uz мазкур масалада Марказий банк масъуллари билан боғланиб, ҳолат юзасидан изоҳ сўради.
Таҳририят сўровига келган жавобга кўра, Марказий банк ёки бошқа бирон бир давлат ташкилоти тижорат банкларининг таъриф сиёсатига аралашмайди. Тижорат банклари ўз хизматлари ҳақини мустақил, яъни бозордаги талаб ва таклиф асосида белгилайди.
Шунингдек, “Банклар ва банк фаолияти тўғрисида”ги Ўзбекистон Республикаси Қонунининг 8-моддасида банклар молиявий операцияларни амалга ошириш билан боғлиқ қарорлар қабул қилишда мустақил эканлиги белгилаб қўйилган.
Унга кўра, давлат органлари ва уларнинг мансабдор шахсларига банклар фаолиятига, шу жумладан, банкларнинг кредит портфелини ва активларини шакллантириш билан боғлиқ тадбиркорлик таваккалчиликларини бошқаришга аралашиш таъқиқланади.
Бундан ташқари, ушбу қонуннинг 62-моддасига мувофиқ, кредитлар, депозитлар бўйича фоиз ставкалари, банк операцияларига оид воситачилик ҳақи миқдорини банк мустақил белгилайди.
Аммо, тижорат банклари томонидан қўлланилаётган ушбу тартиб, барибир, қўшимча саволларни туғдираверади: хўш, мазкур тижорат банклари ўз хизматлари ҳақини мустақил, яъни бозордаги талаб ва таклиф асосида белгилаяптими?..
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!