Тошкент шаҳар Яшнобод туман апелляция инстанцияси судида мудҳиш жиноят иши қайта кўриб чиқилди.

Қайд этилишича, 2022 йилнинг 1 апрель куни 55 ёшли фуқаро ўзининг 46 ёшли (эркак) танишидан 400 минг сўм қарзини сўраш мақсадида унинг уйига борган. Улар биргаликда спиртли ичимлик истеъмол қилган. Судланувчининг ўзи эса наркотик модда таъсирида бўлганини ҳам тасдиқлаган.

Кейинчалик уларнинг ўртасида келишмовчилик сабаб жанжал келиб чиққан. Шовқин овозидан қўшни хонада ухлаётган жабрланувчининг онаси уйғониб кетган ва уларни ажратиш учун борган.

Судланувчи воқеа жойида турган болтани қўлига олиб, унинг орқа қисми билан аёлнинг бўйин қисмига бир маротаба уриб, уни жароҳатлаган. Спиртли ичимлик таъсирида бўлган танишини эса электр кабели орқали, ҳушсиз ётган онасини эса қўллари билан бўғиб ўлдирган ва жиноятни яшириш мақсадида хонадонни ёқиб юборган.

Унга нисбатан 2022 йил 4 октябрь куни Яшнобод туман суди қасддан одам ўлдириш, ўғрилик, мулкни қастдан нобуд қилиш ёки унга зарар етказиш жиноятларини содир этганликда айбли деб топиб, 22 йил муддатга озодликдан маҳрум қилиш жазоси тайинланган.

Суд ҳукмидан норози бўлган, муқаддам 4 маротаба судланган, 2002 йилда қилган жинояти учун белгиланган 19 йиллик қамоқ жазосини тўлиқ ўтаган ҳамда яна жиноят содир этган айбланувчининг иши Тошкент шаҳар суди жиноят ишлари бўйича Судлов ҳайъати апелляция инстанцияси очиқ суд мажлисида қайта кўриб чиқилди.

Судья хулосасига кўра, ҳукм ўзгаришсиз, апелляция шикояти эса қаноатлантиришсиз қолдирилган.

• Жиноят
• Қотиллик
• Суд
• Тошкент