Навоий вилоятида 85 тонна кўмирни сохта юк хати билан олиб кетаётган омбор мудири ушланди. Бу ҳақда Бош прокуратура ҳузуридаги Иқтисодий жиноятларга қарши курашиш Департаментининг матбуот хизмати хабар берди.

Қайд этилишича, Бош прокуратура ҳузуридаги Департаментнинг Навоий вилоят бошқармаси томонидан тезкор тадбир ўтказилган. Ушбу жараён давомида “Кўмир таъминот” АЖнинг Навоий филиали “Зарафшон” кўмир омборхонаси мудири Ф.О. (муқаддам судланган) ўзининг моддий жавобгарлигида бўлган Зарафшон шаҳридаги ижтимоий соҳа ташкилотлари учун ажратилган 85 тонна кўмирни сотиш мақсадида сохта юк хатлари орқали “HOWO” русумли юк автомашиналарида олиб кетаётган вақтида Бухоро вилояти “Сармижон” ЙПХ масканида тўхтатилиб, ушбу кўмир маҳсулотлари ашёвий далил сифатида олинган.

Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят иши қўзғатилиб, тергов ҳаракатлари ўтказилмоқда.

• Навоий