Қарши шаҳрининг бош режасини тасдиқлаш тўғрисидаги Вазирлар Маҳкамаси қарори 2025 йилнинг 25 февралида кучга кирган эди. Унда Қарши шаҳри бош режасининг лойиҳаси Республика архитектура-шаҳарсозлик кенгаши билан келишилгани, шаҳар ҳудудини 2042 йилгача бўлган даврда Косон, Қарши ва Кўкдала туманлари ҳудудига кенгайиши ҳисобга олингани қайд этилган.

Шаҳарнинг ҳудуди айни пайтда 8 минг 308,9 гектарни ташкил этиб, 2030 йилнинг сўнгига қадар 11 минг 26,8 гектар, 2042 йил охиригача эса 16 минг 73,6 гектаргача кенгаяди.

Шу йилларда шаҳар аҳолиси сони 300 минг кишидан мос равишда 400 минг ва 470 минг кишигача кўпайиши кутилмоқда, уй-жой фонди эса бугунги 3 миллион 992,27 минг квадрат метрдан биринчи навбатда 7 миллион 200 минг квадрат метр, ҳисоб даврида 10 миллион 810 минг квадрат метргача ошиши режа қилинган.

Шунда уй-жой билан таъминланиш даражаси бир кишига ўртача 14,1 квадрат метрдан 2030 йилда 18 квадрат метр, 2042 йилда 23 квадрат метргача кўтарилади. Эътиборлиси, шаҳар уй-жой фондининг умумий майдонида 2-3 ва 4-5 қаватли уйларнинг ҳиссаси кескин камайиб, 7, 12, 14 ва 16 қаватли уйларнинг ҳиссаси эса, аксинча, ортади, 9 ва 20 қаватли уйлар қурилади.

Шаҳарнинг бош режасига кўра, аҳолининг ижтимоий соҳа объектларига бўлган талабини амалдаги меъёрларга мослаштириш асносида соҳа кўрсаткичлари жадал суръатларда ўзгаради. Масалан, мактабгача таълим ташкилотларининг қуввати ҳозирги 11,8 минг ўриндан биринчи навбатда 22 минг, ҳисоб даврида 29 минг 140 ўрингача, умумтаълим мактаблари қуввати эса мос равишда 38 минг ўриндан 64 минг ва 74 минг 260 ўрингача ошади.

Худди шу тарзда шаҳардаги шифохона ва поликлиникалар,  дўконлар ва умумий овқатланиш корхоналари, клублар ва маданият саройлари, театр ва кинотеатрлар, меҳмонхоналар ва маиший хизмат кўрсатиш корхоналарининг ҳам хизмат қамрови кенгаяди.

Шаҳарда магистраль кўчаларнинг узунлиги (ҳозир 88 километр) 2030 йил охирида 155,35 километр, 2042 йил якунида 291,33 километрни ташкил қилиб, йилига ташиладиган йўловчилар сони (ҳозир 96 млн нафар) яқин 6 йил ичида 160 млн, 18 йилдан кейин эса 235 млн нафаргача кўпаяди.

Муҳандислик ва техник инфратузилма соҳалари (ичимлик суви, газ, электр энергияси ва иссиқлик таъминоти, канализация) бўйича ҳам жадал ривожланиш назарда тутилган.

Қашқадарё вилояти ҳокимлиги зиммасига қатор муҳим вазифалар, жумладан, уч ой муддатда Қарши шаҳрининг бош режа лойиҳасини амалга ошириш бўйича комплекс чора-тадбирлар дастурини ишлаб чиқиш ва тасдиқлаш учун Вазирлар Маҳкамасига киритиш вазифаси қўйилган.

• Қарши
• Qashqadaryo