Ўтказилган тезкор тадбирлар давомида бир нечта ҳудудларда ер майдонларини ноқонуний равишда сотишга уринган шахслар аниқланди. Оҳангарон туманидаги унитар корхона юристи, илгари судланган шахс, харидорга Нурафшон шаҳрида паррандачилик учун ажратилган 90 сотих ер майдонини 250 минг доллар эвазига беришни ваъда қилган. Шунингдек, танишлари орқали бу ерда коттежлар қуриш учун рухсат олиб беришини айтиб, "хизмати" учун 30 минг доллар талаб қилган. У аванс сифатида 40 минг доллар олаётганида қўлга олинган.

Қашқадарё вилоятида эса туман газ таъминоти бўлими ходими давлат захирасидаги 1 гектар ер майдонини 500 миллион сўмга сотишга келишган. У ҳам олдиндан 20 минг доллар олаётганида қўлга тушган. Бошқа ҳолатда, Бухоро шаҳрида маклерлик билан шуғулланувчи, илгари судланган шахс фуқаронинг 1 250 кв.м майдондаги кўчмас мулк тоифасини ўзгартириб бериш эвазига 14 минг доллар талаб қилган. У ҳам пулни олаётган вақтда ушланди.

Ҳозирда барча ҳолатлар бўйича жиноят ишлари қўзғатилган бўлиб, тергов ҳаракатлари давом этмоқда. Шу билан бирга, мазкур ноқонуний фаолиятга алоқадор бошқа шахсларни аниқлаш учун суриштирув ишлари олиб борилмоқда.

• Бухоро
• ДХХ
• Фирибгарлик
• Qashqadaryo