Ўзбекистон ташқи ишлар вазири Бахтиёр Саидов кеча, 10 сентябрь куни Корея Республикаси бош вазири Хан Дак Су билан учрашди. Бу ҳақда Саидов Telegram каналида
маълум қилди.
Учрашувда Ўзбекистон-Корея Республикаси стратегик шериклигини янада фаоллаштириш, иқтисодий алоқаларни мустаҳкамлаш, аввал эришилган келишувларни амалга ошириш, Ўзбекистон ва Корея Республикаси Ташқи ишлар вазирликлари ўртасида бўлгани каби давлат идоралари ўртасида яқин шериклик алоқаларини ўрнатиш масалалари муҳокама қилинди.
Саидов, шунингдек, дунёдаги энг йирик хотира чиплари ва яримўтказгичлар ишлаб чиқарувчи компаниялардан бири SK hynix президенти Ким Донг Соп билан учрашув ўтказди. Корхона ва ишлаб чиқариш жараёни билан танишилди ҳамда ҳамкорлик алоқаларини йўлга қўйиш муҳокама қилинди.
Саидов Shindong Resources компанияси раҳбари ва Корея-Ўзбекистон бизнес ассоциацияси раиси Ким Ёнг Гу билан ҳам учрашди. Саидовга кўра, ассоциация икки мамлакат ўртасидаги иқтисодий ҳамкорликни ривожлантиришнинг муҳим платформаси сифатида хизмат қилмоқда.
Жорий йил 10-12 сентябрь кунлари Ўзбекистон ташқи ишлар вазири бошчилигидаги ҳукумат делегацияси ташриф билан Жанубий Кореяда бўлади.