Тошкент давлат педагогика университети Халқ таълими вазирлиги таркибига ўтказилади. Бу ҳақида Президент раислигида ўтказилаётган йиғилишда маълум қилинди. 

Йиғилишда Шавкат Мирзиёев келгуси устувор вазифаларни белгилаб берди.

Энг аввало, мактаб ўқитувчиларини янги методика асосида қайта тайёрлаш бўйича умуммиллий лойиҳа бошланади. Президент бу борада Қорақалпоғистон ва Самарқанд тажрибасини кўрсатиб ўтган. 

Қайд этилишича, Қорақалпоғистондаги мобил гуруҳлар бир ой давомида жойида муаллимларни ўқитгани натижасида уларнинг билим ва кўникмалари 15 фоизга яхшиланган.

Шунингдек, Самарқандда 420 нафар илғор педагоглар танлаб олиниб, мобил гуруҳлар вилоятнинг 9 минг нафар ўқитувчилар малакасини оширишни бошлаган. 

Таъкидлаш жоиз, Авлоний институти Республика миллий таълим маркази сифатида қайта ташкил этилади ва Тошкент давлат педагогика университети билан ягона тизимга айлантирилади. 

Умуман, янги методикаларга ўқитиш тизими Миллий таълим маркази ва Тошкент давлат педагогика университетидан бошланади. 

Бундан ташқари, университет Халқ таълими вазирлиги таркибига ўтади, мактаб ўқитувчиларини тайёрлаш ва қайта тайёрлаш бўйича республикадаги таянч муассасага айлантирилади.

Хусусан, ҳудудларда фаолият юритаётган педагогика олийгоҳлари босқичма-босқич университетлар таркибидан алоҳида ажратиб чиқарилади ва мустақил таълим даргоҳига айлантирилади. 

• Президент
• Шавкат Мирзиёев
• Университет
• Халқ таълими вазирлиги