Yengil vazn bo‘yicha UFC chempioni Petr Yan Aljamain Sterlingga qarshi jangi sanasining martdan aprel oyiga ko‘chirilishi uning tayyorgarligiga ta’sir qilmasligini aytdi.

 “Jang sanasining ko‘chirilishi bu UFC rahbariyatining qarori. Yig‘ingacha bo‘lgan muddatning uzaytirilgani menga muammo tug‘dirmaydi”, – deydi rossiyalik jangchi.

Dastlab jangchilar UFC 272 turniri doirasida Las-Vegasda uchrashishlari kerak edi. Shuningdek, u yerda yana bir titul jangi bo‘lgan yarimengil vazn toifasida UFC chempioni Aleksandr Volkanovskiy va Maks Xolloue o‘rtasidagi jang ham rejalashtirilgan edi. Ammo Maks Xolloue olgan jarohati tufayli jang qoldirilgan. UFC rahbariyatining jang sanalariga o‘zgartirish kiritishiga ham shu sabab bo‘lgan.

Aleksandr Volkanovskiyning oktagondagi yangi raqibi koreyalik Chon Chxan Son bo‘lishi aytilmoqda.

Shunday qilib, Petr Yan va Aleksandr Volkanovskiy UFC 273 turniri doirasida oktagonga ko‘tarilishadi. Turnir Bruklin (AQSh)da bo‘lib o‘tishi kerak, ammo manzil o‘zgarishi ham istisno qilinmayapti.

“Men jangning AQSHda bo‘lib o‘tishi Sterlingga qandaydir ustunlik beradi, deb o‘ylamayman. Meni u yerda unga nisbatan ko‘proq odam qo‘llab-quvvatlaydi”, – deydi Yan.

• Sport
• UFC