“Noviye lyudi” partiyasi deputatlari taklifiga ko‘ra, mehnat muhojirlari rasmiy maoshidan ortiq mablag‘ni xorijga o‘tkazmasligi kerak. Tashabbus mualliflari Aleksey Nechayev, Sardana Avksentieva va Vladimir Plyakinning fikricha, bunday taqiq “moliyaviy operatsiyalarning shaffofligini oshirish, yashirin iqtisodiyotga qarshi kurashish, soliq tushumlarini ko‘paytirish va iqtisodiy xavfsizlikni ta’minlash” uchun zarur. Taklif Markaziy bank rahbari Elvira Nabiullinaga yuborildi, deb yozadi “TASS”.

Parlament a’zolarining ta’kidlashicha, amaldagi qonunlarda pul o‘tkazmalari miqdori migrantlarning rasmiy maoshlariga mos kelishini nazorat qilishning samarali mexanizmlari mavjud emas. Ularning fikricha, bu xorij fuqarolariga noqonuniy daromadlarini yashirish, soliqlardan qochish va Rossiyadan pul olib chiqish imkonini beradi. Deputatlar xorijga ruxsat etilgan miqdordan ortiq pul o‘tkazmoqchi bo‘lgan migrantlardan olingan daromadning qonuniyligini tasdiqlovchi deklaratsiya taqdim etish majburiyatini yuklashni taklif qilmoqda.

O‘z navbatida, banklar shubhali operatsiyalarni aniqlash va oldini olish uchun chet elliklarning moliyaviy operatsiyalarini tekshirishni kuchaytirishi kerak, deyiladi xatda.

Rasmiylar mehnat muhojirlari uchun davlat bojini oshirish va kengaytirish masalasini ham muhokama qilmoqda. Qonun loyihasiga ko‘ra, patent berish hamda ishlash uchun ruxsatnomaning amal qilish muddatini uzaytirish uchun 4,2 ming rubl, ushbu hujjatlarning dublikati yoki ularga o‘zgartirish kiritish uchun esa 2,1 ming rubl miqdorida to‘lov belgilanishi ko‘zda tutilmoqda.

Shuningdek, boshqa majburiy to‘lovlarni joriy etish yoki ularni oshirish, jumladan, yashash joyi bo‘yicha ro‘yxatdan o‘tish va Rossiyada bo‘lish muddatini uzaytirish tartiblarini kuchaytirish taklif qilinmoqda.

Ichki ishlar vazirligi ma’lumotlariga ko‘ra, 2024-yil oxirida Rossiyada 6,3 million chet el fuqarosi bo‘lgan. Ularning aksariyati kadrlar yetishmayotgan sohalarda faoliyat yuritadi. Jumladan, 765 mingdan ortiq muhojir qurilishda, 318 ming nafari savdo va transportni ta’mirlash sohasida, 274 ming nafari esa ishlab chiqarish korxonalarida ishlaydi, deyiladi Ichki ishlar vazirligi xabarida.

• Davlat boji
• Rossiya