Uyingizda keraksiz, deyarli sochga taqilmaydigan to‘g‘nog‘ich bo‘lsa, uni tashlab yuborishga shoshilmang. Chunki ular faqatgina sochga taqish uchungina mo‘ljallanmagan...

Tish cho‘tkasi
Sartarosh va kosmetologlarda tyubikdagini olish uchun maxsus vosita – soch to‘g‘nog‘ichlari bor. Ular bilan idishning barmoq yetmas tubiga ham yetish mumkin. Uyingizda tish yuvish vositasi yoki krem tugab qolayotgan bo‘lsa, soch to‘g‘nog‘ich yordamida idishning eng tubidagilarini ham olib, ishlatishingiz mumkin. Ular hech bo‘lmaganda, 3-4 kunga yetib turadi.  

Kitob uchun
Agar qandaydir bir muhim qaydlar, yozuvlar yozilgan qog‘ozlarni yoki kitobning o‘qib bo‘lingan sahifasini adashtirib, yo‘qotib qo‘yasizmi? Unda bu yo‘qotishlarni soch to‘g‘nog‘ichi qaytarishi mumkin. Kitobning siz o‘qib kelgan qismini to‘g‘nog‘ich yordamida mahkamlab qo‘ying. U mahkamlangan yerdan tushib ham ketmaydi, sahifalarni ham oson topa olasiz.

Paketlar uchun
Deyarli barcha xonadonlarda bozorlikdan keyin yig‘ilgan sellofan paketlar bo‘ladi. Ba’zida ular bir uyum bo‘lib yig‘ilib qoladi ham. Paketlar betartib bo‘lib, sochilib yotmasligi uchun bir yerga, paketlarning qo‘l ushlagich tomoniga taqib qo‘ying..

Sim-kartani olishga yordam beradi
Ba’zida telefoning sim-kartasini olishga, almashtirishga majbur bo‘lib qoladi kishi. Qo‘l ostida esa qurilmaning maxsus ignasi yo‘q. Nima qilish kerak? Bu holatda to‘g‘nog‘ichning o‘tkir tomoni bilan sim-karta turuvchi murvatga bosib, uni ochishingiz mumkin.

Yelim tasmaning “boshini” topadi
Yelim tasma ya’ni skotchning ba’zida boshlanish qismini topish qiyin bo‘lib qoladi. Ehhe, bu ish hatto asabga ham tegadi, vaqt oladi. Bunday bo‘lmaslik uchun skotchning boshlanish qismiga, yopishadigan tomonida to‘g‘nog‘ich yopishtirib qo‘ysangiz keyingi safar uni oson topasiz.

Kosmetik vositalar qopqog‘ini ochadi
Bu tavsiya ayniqsa qizlarimiz uchun qo‘l keladi. Tirnoqdagi manikyurga zarar yetmasligi uchun kosmetik vosita idishini to‘g‘nog‘ich yordamida oching.