Respublika baxshichilik sanʼati markazi va uning huzuridagi Baxshichilik sanʼatini rivojlantirish jamgʻarmasi faoliyatini tashkil etish toʻgʻrisida Hukumat qarori qabul qilindi. Bu haqda Adliya vazirligi rasmiy telegram kanalida xabar berdi. 

Qarorga muvofiq, 2019/2020-oʻquv yilidan boshlab Termiz shahridagi 21-son baxshichilik maktabi negizida baxshichilik sanʼatiga ixtisoslashtirilgan respublika maktab-internati tashkil etildi.

Maktab-internatga qabul 2021/2022-oʻquv yilidan boshlanadi.

Shuningdek, 2020/2021-oʻquv yilidan boshlab Oʻzbekiston davlat sanʼat va madaniyat institutida baxshichilik va dostonchilik taʼlimi yoʻnalishi tashkil etiladi.

Qaror bilan, Baxshichilik sanʼatini rivojlantirish jamgʻarmasi mablagʻlarini shakllantirish va ulardan foydalanish tartibi toʻgʻrisida nizom ham tasdiqlandi.

Nizomga koʻra, Jamgʻarmaning asosiy vazifalaridan biri baxshichilik sanʼatini yanada rivojlantirishga koʻmaklashish, baxshi-shoir,oqinlarni har tomonlama qoʻllab-quvvatlashdan iborat.