Isroil bosh vaziri Binyamin Netanyaxu Eronga hujumi bilan butun dunyo e’tiborini G‘azo sektoridagi voqealardan chalg‘itishga muvaffaq bo‘lgan. Isroilning sobiq bosh vaziri Ehud Olmert Britaniyaning The Economist jurnaliga bergan intervyusida shu haqda ma’lum qildi.

“G‘azodagi operatsiyani davom ettirish Isroilga muvaffaqiyat keltirmaydi. Buning narxini to‘lashga majbur bo‘ladi. Bu narx – halok bo‘lgan askarlar, yo‘qotilgan garovga olinganlar, o‘ldirilgan g‘azoliklar va Isroilning xalqaro darajada qo‘llab-quvvatlanishining zaiflashishi”, — degan siyosatchi.

Erondagi vaziyatga to‘xtalar ekan, u Isroil hujumlari “90 milliondan ortiq aholi va ming yillik madaniy merosga ega bo‘lgan davlatni tiz cho‘ktirishi” haqidagi da’volarni “takabburlik va noreal” deb atagan. “Eron Amerika hujumi kabi o‘ta og‘riqli zarbadan keyin ham qulab tushmaydi va parchalanmaydi”, – degan u.

Olmert Eron hali ham uzoq va qisqa masofaga uchuvchi raketalarning kuchli arsenaliga ega ekanligini eslatdi. Shuningdek, u Eron bilan urush Isroil iqtisodiyotini deyarli butunlay falaj qilganini qayd etgan.

• Binyamin Netanyaxu
• Dunyo
• Eron