Yurak sohasida og‘riqning paydo bo‘lishi jiddiy muammo, albatta. Biroq og‘riqqa 90 foiz holatda yurak sababchi bo‘lmaydi.  
Bunga boshqa qator kasalliklar sabab bo‘lishi mumkin. Ulardan ayrimlari haqida to‘xtalib o‘tamiz. 
  
Qovurg‘alar oralig‘i nevralgiyasi
 
Bu kasallikni  yurak og‘irig‘i deb qabul qilishadi. Chunki u stenokardiya his qiladigan og‘riqqa juda o‘xshaydi. Ammo ularning farqi bor. Og‘riq harakatlanganda, yo‘talganda, kulganda, nafas olganda kuchayadi. 
 
Osteoxondroz
Ko‘krak osteoxondrozi (umurtqa pog‘onasi kasalligi)da go‘yo yurak og‘riyotgandek tuyuladi. Chunki orqa, qorin tepasi og‘riydi va nafas olib, chiqarganda kuchayadi.  Ikki kurak orasi va chap qo‘l muzlab qolganga o‘xshaydi. Stenokardiya (yurakning ma’lum bir qismida qon ta’minotining yetishmovchiligidan kelib chiqqan ko‘krak qafasidagi o‘tkir og‘riq)ga o‘xshash jihatlari ham bor. Biroq osteoxondrozda nitroglitserin yordam bermaydi.

Oshqozon kasalliklari  
Oshqozon devorlarining mushaklari spazmi ko‘krakka og‘riq beradi. Biroq u jig‘ildon qaynashi, chanqash va qayt qilish bilan farqlanadi.  
Pankreatit (oshqozon osti bezining yallig‘lanishi)ning o‘tkir shaklini, shubhasiz, yurak xurujiga yo‘yish mumkin. Chanqash va qayt qilish sababli infarkt bilan ham adashtirishadi. Garchi o‘t pufagi va jigar o‘ng tomonda joylashgan bo‘lsa-da,  og‘rig‘ini ko‘krakning chap tomoniga beradi. 
 Qizilo‘ngach churrasida ham shunday, og‘rig‘i stenokardiyaga o‘xshaydi.  

Markaziy asab tizimi 
Markaziy asab tizimi buzilishlaridagi og‘riqlar uzoq davom etadi va ko‘krak sohasida, chap tarafning pastki qismida kuchayadi. Farqi: odamning uyqusi buziladi, asabiylashib qoladi, qo‘rquv kuchayadi. Bunday vaziyatda tinchlantiruvchi dorilar yordam beradi.  
Agar ko‘krak sohasida og‘riq sezilsa, uni o‘z bilganicha davolash mumkin emas.